भांगरभूंय | प्रतिनिधी
पणजी: केंद्र सरकारान १०० मिलीग्रामा परस चड निमेसुलायडचो आस्पाव आशिल्ल्या सगळ्यां ओरल फॉर्मुलेशन वखदांचें उत्पादन, विक्री वा वितरण करपाचेर वखदां आनी कॉस्मेटीक्स कायदो १९४० खाला बंदी घातल्या, अशी म्हायती अन्न आनी वखदां प्रशासन संचालनालयान दिल्या. निमेसुलायड वखदांचो वापर मनशाक धोक्याचो थारूंक शकता आनी ह्या वखदांक सुरक्षीत पर्याय उपलब्ध आसा. वखदां तांत्रीक सल्लागार मंडळाच्या शिफारसी प्रमाण ही बंदी घातल्या.
त्या खातीर राज्यांतले सगले वखदां विक्रेते, उत्पादक, सरकारी हॉस्पिटल्स, जिल्लो हॉस्पिटल्स, भलायकी खात्या खालचीं नागरी भलायकी केंद्रां, सामाजीक भलायकी केंद्रां, मुळावीं भलायकी केंद्रां, दवाखाने, गोंय वैजकी म्हाविद्यालय आनी हास्पिटल, नर्सींग होम्स/हॉस्पिटल्स, गोंय वैजकी मंडळ/आयएमए तशेंच राज्यांतल्या नोंदणीकृत वैजकी दोतोरांनी ह्या बंदीची नोंद घेवन निमेसुलायड वखदांची विक्री आनी वापर बंद करचो. विक्रेत्यां कडेन निमेसुलायड वखदांचो स्टॉक आसल्यार तो उत्पादकाक परत करचो, अशें अन्न आनी वखदां प्रशासन संचालनालयान कळीत केलां. ह्या बंदीचें नोटिफिकेशन अन्न आनी वखदां प्रशासन संचालनालयाच्या www.dfda.goa.gov.in हे अधिकृत वेबसायटीचेर अपलोड केल्लें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
