भांगरभूंय | प्रतिनिधी
पणजी: शिंयाळ्या विधानसभा अधिवेशनाच्या दुसर्या दिसा मुरगांवचे आमदार संकल्प आमोणकार हांणी मुरगांव उदकाचे समस्येेचेर प्रस्न मांडलो. ह्या प्रस्नाक जाप दितना उदका पुरवण मंत्री सुभाष फळदेसाय हांणी म्हालांतल्या उदका पुरवणेची सविस्तर आकडेवारी मांडली. मुरगांव मतदारसंघांतली उदकाची समस्या येवपी एप्रील म्हयन्या मेरेन पुरायेन सुट्टली, अशी गवाय तांणी विधानसभेंत दिली.
४४३ कोटी रुपया खर्चून उबारपी हो म्हत्वाचो उदकाचो प्रकल्प सध्या निमाण्या टप्प्यांत पावला. हाका लागून मुरगांवच्या लोकांक सुसेग मेळटलो, अशें मंत्री फळदेसाय हांणी सांगलें.
मुरगांव म्हालाची वट्ट गरज पळयल्यार ती ८१ एमएलडी आसा. सध्या ७७ ते ७८ एमएलडी उदकाची पुरवण जाता. मुरगांवचो कांय भाग भौगोलीक नदरेन उंचायेर आशिल्ल्यान उदक पावयतना तांत्रीक आडमेळीं येतात. फकत तांत्रीक इबाडाक लागूनच केन्नाय उदक नासतना, अशें तांणी स्पश्ट केलें.
हे समस्येचेर कायमचो उपाय करपाक खातीर सरकारान ४४३ कोटींचो प्रकल्प हातांत घेतला. हाचे खाला नवीं उदकाचीं पायपां घालपाचें काम जावपाचे वाटेर आसा, मुरगांवां एक स्वतंत्र जलकुंभ (रिझर्व्होअर) बांदतले. एप्रील २०२६ मेरेन ह्या प्रकल्पाचें काम पुराय जाले उपरांत उंचायेर आशिल्ल्या वाठारांनीय जाय तितलें उदक मेळटलें आनी सेगीत येवपी उदकाचे प्रस्न पयस जातले, असो विस्वास मंत्री सुभाष फळदेसाय हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
