भांगरभूंय | प्रतिनिधी
पणजीः कोळश्यावेल्यान विधानसभा परत गाजली. गोंयांत कोळसो नाका अश्यो घोशणा दीत विरोधी आमदारांनी सभापतींच्या हौदांत धाव घेतली. पर्यावरण दाखलो नासतनाय मुरगांव बंदराच्या अतिरीक्त कोळशाची हाताळणी जाता. तशेंच मुख्यमंत्री डॉ. प्रमोद सावंत कोळशाच्या विशयाचेर दिशाभूल करता, असो आरोप विरोधी पक्ष फुडारी युरी आलेमांव हांणी केलो.
शिंयाळ्या विधानसभा अधिवेशनांत कोळशाचो विशय परत गाजलो. केपेंचे आमदार एल्टन डिकॉस्टा आनी युरी आलेमांव हांणी ह्या विशयाचेर सरकाराक धारेर धरले.
मुरगांव बंदर प्राधिकरण (एमपीए) श्रेणी अ बंदरांत ५ हजार मिलीयन मेट्रीक टन पर्यावरण दाखलो नासतना कोळशाची हातळणी जाता आनी हें सरकारान आरटीयंत दिल्ले जापेंतल्यान स्पश्ट सांगलां. दाखलो नासून लेगीत गोंय प्रदुशण नियंत्रण मंडळान तांकां हाताळणी खातीर परवानगी दिल्या, असो आरोप डिकोस्टा हांणी केलो.
हे विशीं जाप दितना मुख्यमंत्री डॉ. प्रमोद सावंत हांणी, एमपीएत तीन कंपनी कोळशाची हातळणी करतात. तातूंत जेएसडब्ल्यु ५.५ एमएमटी, अदानी ४.६ एमएमटी आनी मुरींग डॉल्फीन ०.१ एमएमटी कोळशाची हाताळणी केल्या आनी हे तिगांय कडेन पर्यावरण दाखलो आसा, अशें मुख्यमंत्र्यान स्पश्ट केलें.
मात मुख्यमंत्री सभाघराची दिशाभूल करता असो आरोप करून आलेमांव हांणी सांगलें, संसदेंत खासदार विरीयातो फर्नांडीस हांच्या प्रस्नाची जाप दितना दुसरें इंजीन सांगता, एमपीएत पांच सुवातींनी कोळशाची हाताळणी जाता आनी दुसरें इंजीन सांगता तीन सुवातींनी हाताळणी जाता.
पयलें इंजीन सांगता एमपीएच्या ब्रेक वॉटर बर्थांत लेगीत कोळशाची हाताळणी जाता. जएसडब्ल्यून फाटल्या तीन वर्सांनी ३० एमएमटी कोळशाची हाताळणी करून, कायदो मोडून कारणां दाखया नोटीस काडल्या. मात सरकार कारवाय करची सोडून न्हिदलां, असो आरोप आलेमाव हांणी केलो.
मात हो विशय सर्वोच्च न्यायालयांत न्याय प्रविश्ठ आसा अशी जाप मुख्यमंत्र्यान दिले उपरांत विरोधकांनी सभापतींच्या हौदांत धांव घेवन गोंयांत कोळसो नाका अश्यो घोशणा दिवपाक सुरवात केली आनी ह्या बोवाळा मजगतीं मुख्यमंत्र्यान आपलें स्पश्टीकरण दिवप चालूच दवरलें. कांय वेळ बोवाळ केले उपरांत विरोधक आपले सुवातेर येवन बसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
