भांगरभूंय | प्रतिनिधी
पणजी: गोंयच्या खेळां प्रशिक्षकांचे कुशळटायेचो आनी वेळाचो वर्सभर प्रभावी वापर करपा खातीर सरकार येवपी शिक्षणीक वर्सा सावन राज्यांत ‘स्पोर्ट्स एक्सलन्स सेंटर्स’ आनी ’स्पोर्ट्स स्कुल्स’ सुरू करतलें, अशी म्हत्वाची घोशणा खेळां मंत्री रमेश तवडकार हांणी विधानसभा अधिवेशना मजगतीं केली. राज्यांतल्या ११० परस चड खेळां प्रशिक्षकांचो वापर पावसाच्या काळांतूय योग्य तरेन जावचो, हो ह्या निर्णया फाटलो मुखेल हेतू.
सध्या राज्यांत कार्यरत आशिल्ल्या खेळां प्रशिक्षकांक दर म्हयन्याक १.५ लाख रुपयां मेरेन पगार दितात. मात, मान्सूनच्या काळांत मैदानी खेळांचेर मर्यादा आयिल्ल्यान ह्या प्रशिक्षकांच्या सेवांचो अपेक्षीत लाव घेवपाक मेळना. पावसांत भायले उपक्रम बंद आशिल्ल्यान प्रशिक्षकांनी रिकामे बसप योग्य न्हय. तांचो उपेग वर्साचे ३६५ दीस जावपाक जाय, अशें मत उक्तावन मंत्र्यांनी ह्या नव्या नियोजनाची म्हायती दिली.
हे येवजणे खाला मडगांव, बांबोळे आनी पेडणेंच्या इनडोअर स्टेडियमा सयत खाजगी संस्थांतल्या इनडोअर मुळाव्या सुविधांचो वापर करतले. हाका लागून खेळगड्यांक पावसांतूय सेगीत प्रॅक्टीस करपाक मेळटली आनी प्रशिक्षकांकूय आपली जापसालदारकी पुराय तांकीन सांबाळपाक मेळटली. हे विशीं बेगीनूच एक सविस्तर प्रस्ताव आनी विशे येवजण सादर करतले. हाका लागून गोंयच्या खेळां मळाचें मुखामळ बदलतलें, असो विस्वास मंत्री तवडकार हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
