भांगरभूंय | प्रतिनिधी
पणजी: पणजे दिवजां सर्कला लागसार मध्यान रातीं भिरांकूळ अपघात जालो. तमिळनाडू नोंद आशिल्ले एके गाडयेन एक दुचाकी सयत पर्यटकांचे टॅक्सीक आनी हेर पार्क केल्ल्या वाहनांक धपको दिलो. ह्या अपघातांत एके बायले वांगडा दोग जाण गंभीर जखमी जाल्यात, तांकां बेगोबेग गोमेकॉंत दाखल केल्यात.
हे विशीं मेळिल्ले म्हायती प्रमाण, दिवजां सर्कल ते हिरा पेट्रोल पंप हाचे मजगतीं हो अपघात जालो. हातूंत चारचाकी आनी दुचाकी वाहनांचें व्हड लुकसाण जालें. तशेंच ह्या धपक्यान ते तमिळनाडुचे गाडयेचो एक टायर निखळून रस्त्याचे दुसरे वटेन शेंवटलो. हाचेवेल्यान गाडयेचो वेग कितलो आसतलो हाचो अदमास येता.
घडणुकेची म्हायती मेळटांच पुलिसांनी घडणुके सुवातेर वचून तपास सुरू केलो. अपघात पळोवप्यांनी दिल्ले म्हायती प्रमाण, मुखारच्यान येवपी वाहनांच्या खर लायटीक लागून दोळे दिपकावले आनी गाडयेवेलें नियंत्रण सुटलें, असो दावो संबंदीत ड्रायव्हरान केला. आहे. पुलिसांनी हो दावो गंभीरपणान घेतला. चालकान ह्या वेळार सोरो पियेल्लो काय, हें तपासपा खातीर ताची अल्कोमिटर तपासणी करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
