भांगरभूंय | प्रतिनिधी
अशें कितलो तेंप चलतलें? असल्या घडणुकां फाटल्या सुत्रधारांक अटक जाली ना जाल्यार आनीक हत्याकांडां, जॉब स्कॅमां, मारबडय प्रकरणां गोंयांत जायत रावतलीं.
सैमान नटिल्लें पाचवेचार गोंय आतां पयलींचे गोंय उरूंक ना. गोंयच्या शारांतल्या रस्त्यांचेर नदर मारीत जाल्यार, गोंयांत आयज दिल्ली, हरियाना, राजस्थान, महाराष्ट्र, तामीलनाडू, कर्नाटक, तेलगांणा, उत्तर प्रदेश, मध्य प्रदेश अशा साबार राज्यांतल्यो गाडयो भोंवतना दिसतात. गोंयांत व्हड प्रमाणांत हेर राज्यांतले लोक आयिल्ले आसात. तातूंतले कांय जाण गुन्यांवकारी प्रवृत्तीचे आसात. देखून गोंयांत हालीं तेंपार गुन्यांव व्हड प्रमाणांत घडत आसात. ते गुन्यांव करतात आनी हेर राज्यांनी पळून वतात. हें सदाचेंच जालां. पुलीस प्रयत्न करून कांय गुन्यांवकारांक अटक करतात. पूण कांय गुन्यांवकार सांपडनात. अजापाची गजाल म्हळ्यार गुन्यांव करपाक लावपी खरो सुत्रधार केन्नाच सांपडना. हें पुलिसांचे अपेस काय लोकांचें दुर्दैव तेंच समजना. कसलोय गुन्याव जावं- मागीर तो खून आसूं वा मारबडय पुलीस कांय चिरपूट लोकांक धरतात आनी प्रकरण पालयतात. गुन्यांवां फाटलो खरो गुन्यांवकार केन्नाच लोकांक
कळना.
समाजीक वावुरपी रामा काणकोणकार हांची केस घेयात. तांकां सप्टेंबर 2025त पांच स लोकांनी दिसा उजवाडा करंजाळे दनपारच्या वगतार भर रस्त्यार भरपूर बडयलो. रामा काणकोणकाराक बेगोबेग उपचार मेळिल्ल्यान तो वाटावलो. पुलिसांनी सीसीटीवी फुटेजीच्या आदाराचेल मारबडय करपी गुन्यांवकारांक रोखडेच धरले. पूण मास्टरमांयडाक अटक करपाक पुलिसांक अजून यश मेळूंक ना. रामा काणकोणकाराक मारबडय करतकच गोंयभर बोवाळ जालो. सगली कडेन तिडकीचें ल्हार पातळ्ळें. कांय वाठारांनी लोकांनी कँडल मार्च काडून ह्या गुन्यांवा फाटलो खरो सुत्रधार कोण हो पुलिसांनी सोदून काडचो अशी मागणी केली. पूण जालें कितें? ढो ढो फो. खंयचे कडेन काय ना. काय वेळान सगले लोक हें प्रकरण विसरून गेले आनी सरकाराक आनी पुलिसांक जाय आशिल्लें तशेंच जालें. पुलिसांनी जांकां धरल्यात तांचें रामा काणकोणकारान किदें वायट केलां अशें दिसना. तांकां कोणे तरी रामा काणकोणकाराचेर खुनी हल्लो करपाक लायला अशें साबार लोकांक दिसता. दिसना तें फक्त पुलिसांक आनी सरकाराक. नाजाल्यार येन्ना मेरेन खऱ्या सुत्रधाराक अटक जातली
आशिल्ली.
हालींच गोंयांत कोट्यांनी रुपयांचे जॉब स्कॅम जालें. पांच स बायलांक धरलीं आनी कांय दीस कादयेंत दवरलीं. चवकशी केले उपरांत तांकां सोडलीं. तातूंतलें पुजा नायक हे बायलेमनशेन तोंड उगडपाचे धाडस केलें आनी ताणें पयशे लोकां कडल्यान घेवन कोणाक खंय दिलें हें सांगले. तशेंच ती नार्को टेस्टीक लेगीत तयार जाली. पुलिसांनी आपले परीन तपास केलो आनी पुजा नायकाच्या म्हणण्याक कांयच तथ्य ना अशें घोशीत केलें. पुलिसांनी अजून मेरेन हेर बायलांच्या चवकशी सबंदान कसलीच म्हायती लोकांक दिवंक ना. कितल्या लोकांचे पयशे बुडले हाची सारकी कोणाक खबर ना.
सरकारान गोंय कर्मचारी आयोगाची स्थापणूक करून कर्मचाऱ्यांची भरती सुरू केली. मुखेलमंत्री नेटान सांगतात की कर्मचाऱ्यांची नियुक्ती ही गुणवत्ते प्रमाण जातली. ही बरी गजाल. पूण हेर सामान्य तरणाट्यांचे किदें? तांकां नोकरी करपाचो अधिकार ना. तांणी जीव दिवपाचो. आयज कितलेशेच तरणाटे पदव्यो घेवन घरा बेकार बसल्यात. पिरायेचीं तीस वर्सां उलटून गेलीं तरी नोकरी नाशिल्ल्यान चलयांचीं लग्नां जायनात. म्हणून आवय- बापूय लाचार जावन नोकऱ्यां खातीर दुडू दिवपाक तयार जातात आनी ते खातीर जॉब स्कॅमां जल्म घेतात. पूण ह्या जॉब स्कॅमा फाटलो कोण तरी सुत्रधार आसतलोच न्हय? नाजाल्यार त्या बायलांक पयशे घेवपाचें धाडस कशें जालें? सरकार हो खरो सुत्रधार कोण हें सोदून काडूंक शकना ही अजापाचीच
गजाल आसा.
साल्वादोर द मुंद गांवांत 2020 वर्सा विलास मेथेर ह्या समाजीक वावुरप्याक कांय लोकांनी जिवेशी लासून उडयलो. हें प्रकरण गोंयांत बरेंच गाजलें. पुलिसांनी ह्या खुनाक जापसालदार आशिल्ल्या गुन्यांवकारांक अटक केली आनी गुन्यांव करपाक वापरिल्ली गाडी लेगीत जप्त केली. पुलिसांनी उपरांत चवकशी पुराय करून कोर्टांत कितल्याशाच पानांचें चार्जशीट फायल केलें. ह्या खुनाक आयज पांच वर्सा पुराय जालीं. विलास मेथर हो एक समाजीक वावुरपी आशिल्लो. बेकायदेशीर बांदकामां आड तो वावुरतलो हें सगल्यांक खबर आसा. मरचें पयली ताणें सांगिल्लें की बेकायदेशीर बांदकामां संबदान कागाळ करपाक तो साल्वादोर द मुंद पंचायतींत गेल्लो आनी कांय जाणांनी ताचेर पेत्रोल ओतून ताका लासून उडोवपाचो यत्न केलो. हाचे विशीं एक व्हिडियो आसा. अशें आसून लेगीत पुलिसांनी ते नदरेन कित्याक तपास करूंक ना? पुलिसांचेर कोणाचो दबाव आसा. ह्या खुना फाटलो खरो सुत्रधार कोण हे लोकांक कळूंक जाय.
अशें कितलो तेंप चलतलें? असल्या घडणुकां फाटल्या सुत्रधारांक अटक जाली ना जाल्यार आनीक हत्याकांडां, जॉब स्कॅमां, मारबडय प्रकरणां गोंयांत जायत रावतलीं. गोंय ल्हवू ल्हवू गुन्यांवकारांचो अड्डो जांवक लागला. ताका लगाम घालूंक जाय. मुखेलमंत्र्यान असल्या प्रकरणांनी स्वता लक्ष घालून पुलिसांक खरो सुत्रधार कोण हें सोदून काडुंकूच जाय अशें फर्मावंक जाय. भियेवपाची गरज ना म्हणून भागना. भियेवपाची गरज आसा नाजाल्या गोंयचें रुपांतर बिहार राज्यांत केन्ना जालें हें कळचेंच ना.
अनिल शंखवाळकार
9763718518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
