भांगरभूंय | प्रतिनिधी
काणकोणां फेणोरी, चिरुटी पदार्थ फामाद आशिल्ले
काणकोण: चावडी काणकोणां पोरण्या बस स्टॅण्डा कुशीक नगर्सेचे बाबुसो नायक ‘कॅफे सेंट्रल’ नांवाच्या हॉटेलांतल्यान काणकाेणकारांक आनी कोणकोणां भायल्यान येवपी लोकांक च्या, फराळ दिताले. चाररस्तो हांगासरल्या कामतीच्या हॉटेलांत मिक्स भाजी, भास्काराच्या हॉटेलांत शिरो जाल्यार बाबुसोदादीच्या हॉटेलांत फेणोरी आनी चिरुटी हें पदार्थ फामाद आशिल्ले.
बाबुसोदादीचे कॅफे सेंट्रल फक्त च्या फराळाचे हॉटेल नाशिल्लें जाल्यार त्यावेळा वेल्या मगो पक्षाच्या कार्यकर्त्यांची बसपाची सुवात लेगीत आशिल्ली. हॉटेला भायर दवरिल्ले दोन बांक हे राजकी चर्चे खातीर आनी काणकोणांतल्या विवीध प्रस्नाचेर चर्चा करपा खातीर एक बरी सुवात आशिल्ली. तेच खातीर ते बांक दवरिल्ले अशें म्हणल्यार चुकीचें थारचें ना.
धवो शर्ट, काळी पेंट घालून बाबुसोदाद गल्ल्यार बसताले आनी थंय सावन आपल्या हॉटेलांतल्या 10-15 वेटरा कडल्यान हॉटेलांत येवप्याची सेवा करताले. बाबुसोदाद गल्ल्यार बशिल्ले सगल्यांकूच दिसताले. पूण फांतोडेर चार वरांचेर उठून भाजी, च्या, बटाटवडे ते तयार करताले आनी उपरांत गल्ल्यार बसताले. बाबुसोदादीच्या ह्याच हॉटेलाचेर गोंयचीं दिसाळीं आनी मुंंबयचीं दिसाळीं लेगीत मेळटालीं. उमाकांत दलालाच्या आनी बाबुसोदादीच्या दुकानाचेरूच लोकांक थळावी आनी देश, विदेशांतली म्हायती फक्त दिसाळ्यांतल्यान कळटालीं.
काल बाबुसोदाद आनी हेरांचीं दुकानां आशिल्ली पोरणी जीर्ण घातक इमारत काणकोण पालिकेन मातयेभरवण केली. ह्या मातयेभरण केल्ल्या इमरती बराबरच ज्या इमारतींत आशिल्ल्या कॉफे सेंट्रल हॉटेलांत, जे जे काणकोणचे फुडारी घडले तें हॉटेल आयज मातयेभरवण जावपा बराबरच बाबुसोदाद आनी काणकोणच्या राजकी आनी समाजीक आंदोलनाच्या इतिहासाच्यो खुणो लेगीत मातयेभरवण जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
