भांगरभूंय | प्रतिनिधी
पणजी : शिरगांवां लयराई जात्रेंत जाल्ली खेटाखेट आनी बर्च बाय रोमीओ लेन क्लबाक लागिल्ल्या उज्यांत मरण आयिल्ल्यांक आयज गोंय विधानसभेंत आर्गां ओंपलीं. राज्यपालांच्या अभिभाशणा उपरांत सभापती गणेश गांवकार हांणी आर्गां ओंपपाचो प्रस्ताव मांडलो. सभाघरांतल्या सगल्यांनी एक मिनीट शांतता पाळून मरण आयिल्ल्यांक आर्गां ओंपलीं. ह्या वेळार कॉंग्रेस सयत विरोधी पक्षांचे आमदार सभाघरांत हाजीर नाशिल्ले.
ताचे पयलीं राज्यपाल पुसापुती अशोक गजपती राजू हांणीय अभिभाशणात मरण आयिल्ल्यांक आर्गां ओपलीं. शिरगांवची खेटाखेट, बर्च घडणूक आनी रस्त्यार जावपी अपघातांत मरण आयिल्ल्यांक हीं आर्गां ओंपतां, असो उल्लेख राज्यपालांनी भाशणांत केलो.
शिरगांवचे जात्रेंत फाटल्या वर्सा जाल्ले खेटाखेटींत ६ भाविकांक मरण आयिल्लें. तशेंच बर्च बाय रोमिओ लेन क्लबाक उजो लागून २५ जाणांक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
