विकसीत गोंयची उद्दीश्टां 2037 मेरेन जातलीं पुराय

भांगरभूंय | प्रतिनिधी

राज्यपालविकसीत गोंय 2037चो आराखडो निमण्या पांवड्यार

पणजी : प्रधानमंत्री नरेंद्र मोदी हांणी २०४७ मेरेन विकसीत भारत करपाचे उद्दीश्ट दवरलां. विकसीत भारत २०४७च्या धर्तीचेर २०३७मेरेन विकसीत गोंय करपा खातीरचो आराखडो निमण्या पांवड्यार पावला. २०३७ मेरेन विकसीत गोंयां खातीरची सगळीं उद्दीश्टां पुराय जातलीं, असो विस्वास राज्यपाल पुसापती अशोक गजपती राजू हांणी अभिभाशणांत उक्तायलो.
पांच दिसांच्या शिंयाळ्या अधिवेशनाची सुरवात आयज सोमारा राज्यपाल पुसापती अशोक गजपती राजू हांच्या अभिभाशणान जाली. मुळाव्यो सुविदा, भलायकी, शिक्षण, वीज. भौशीक बांदकाम, शेती, उदका पुरवण, कला, समाज कल्याण, नुस्तेमारी ह्या सगळ्या वाठारांतल्या कामगिरीचो नियाळ राज्यपालांनी अभिभाशणांत मांडलो.
अभिभाशणांत राज्यपालांनी मांडिल्ले खाशेले मुद्दे अशे आसात:

• कुशावती ह्या तिसर्‍या जिल्ह्याक लागून मुळाव्यो सुविदा तयार जावन प्रशासन लोकांच्या दारान पावतलें.
• पयलेच खेपो गोंयचो नक्शो कोंकणींतल्यान तयार जाला. गोंयचें दायज, संस्कृती आनी कोंकणीक उर्बा मेळपाचे दिकेन म्हत्वाचें पावल.
• घर नांवार करपी म्हजें घर येवजणेक लागून हॅप्पीनेस इंडेक्स (समाधान) वाडटलो.
• २८ फेब्रुवारी २०१४ मेरेनची घरां नियमीत करपा खातीर भूंय महसूल संहितेच्या कलम ३८ – ए मदीं दुरूस्ती.
• कोमुनिदाद जमिनींतलीं घरां नेमीत करपा खातीर कोमुनिदाद कायद्यांत दुरूस्ती.
• रूका कायद्याखाला पंचायत वाठारांत ६०० चौमी आनी पालिका वाठारांत १ हजार चौमी मेरेनची बांदकामां नेमीत.
• जिल्लो पंचायत वेंचणूक घेवपा खातीर राज्य वेंचणूक आयोगाक परबीं.
• पद्मश्री खातीर लिबिया लोबो सरदेसाय आनी गोमंत विभूशण पुरस्कारां खातीर अजितकुमार कडकडेक परबीं.
• इफ्फी खातीरच्या मुळाव्या सुविदांक लागून गोंयची सर्जनशील रायपाटण अशी वळख.
• आंकडेवारी प्रमाण २०२३ – २४ वर्सा गोंयचो विकास दर १४.९४ टक्के
• कायदो सुवेवस्था नियंत्रणांत. गुन्यांवांच्या तपासाचें प्रमाण ८७.७२ टक्के.
• सायबर गुन्यांवांच्या तपासा खातीर एआय आधारीत तपास प्रणाली. सायबर क्रायम केंद्र जातलें घटमूट.
• सांगें, तळपण आनी मायणा कुडतरी पुलीस ठाण्या खातीर नव्यो इमारती
• सरकारी सेवा कार्यक्षम करपा खातीर कर्मचारी भरती आयोगा वरवीं गुणवान कर्मचार्‍यांची भरती.
• कागाळी, समस्या मांडपा खातीर नवो ऍड्रोयड आनी आयओएस आदारीत ऍप.
• उजो पालोपी दळान ऑक्टोबर मेरेन १४० मनशां आनी ६९० जनावरांचो जीव वाटायलो. २९.५४ कोटींची मालमत्ता वाटायली.
• दिवचल, वास्को नवीं फायर स्टेशनां. वाळपय फायर स्टेशनाचें रोखडेंच उक्तावण.
• रस्तो अपघात लुकसाणभरपाय येवजणेखाला ५९ जाणाक १.१८ कोटींची भरपाय.
• ग्राम समृद्धी येवजणे खाला नोव्हेंबर मेरेन १०.६५ कोटींचीं २६ कामा पुराय. १६ कामां पुराय जावपाचे वाटेर.
• गोंयच्या साक्षरतेचें प्रमाण ९९.७२ टक्के. राष्ट्रीय प्रमाण ९५ टक्के.
• सरकारी म्हाविद्यालय सांखळे, खांडोळा आनी केप्या हॉस्टेल सुविदा.
• ३०४८ शेतकारांक २३९.४८ लाखांची आदारभूत रक्कम.
• १२६३ शेतकारां कडल्यान १३८५.५१ मेट्रिक टन भाजयेची खरेदी.
• मुख्यमंत्री सुदारीत कामधेनू येवजणे खाला २७ शेतकारांक ६६.५८ लाखांचें अनुदान.
• २०२१३ – २४च्या तुळेंत अंदूं नुस्त्याचें उत्पादन १.१७ टक्क्यांनी वाडलें.
• १२ खण ब्लॉकांची पावणी. ५ खण ब्लॉक सुरू. २५२.८३ कोटींची येणावळ.
• दोना पावल परिशद घरा खातीर निविदा जारी.