बर्च क्लब घडणुके वेल्यान सभाघरांत बोवाळ

भांगरभूंय | प्रतिनिधी

पणजीः शिंयाळ्या अधिवेशनाच्या पयल्याच दिसा बोवाळ पळोवपाक मेळ्ळो. राज्यपालांचें अभिभाशण सुरु आसतना बर्च क्लब घडणुकेवेल्यान विरोधी आमदारांनी सभाघरांत बोवाळ घालीत सभापतीच्या हौदात धांव घेतली. उपरांत मार्शलांनी विरोधी आमदारांक सभाघरांतल्यान भायर काडले.
सोमारा सभाघराचें शिंयाळें अधिवेशन राज्यपालांच्या अभिभाशणान सुरू जालें. जेन्ना राज्यपाल पुसापती गजपती अशोक राजू हांणी आपल्या अभिभाशणाक सुरूवात केली तेन्ना विरोधी पक्ष फुडारी युरी आलेमाव हे उबे रावन तांणी बर्च घडणुकेंत जे २५ निश्पाप जीव गेल्यात तांकां एक मिनटा खातीर शांती दवरून तांकां आर्गां ओपपाची मागणी केली.
मात राज्यपालान आपलें अभिभाशण चालूच दवरिल्ल्यान युरी आलेमाव हांणी बरोच बोवाळ करीत बर्च घडणुके फाटल्यान जापसालदारकी निश्‍चीत करीत आपल्या अभिभाशणांत बर्च घडणुकेचो उल्लेख करचो अशी मागणी केली. उपरांत सगल्या विरोधी आमदारांनी बर्च घडणुकेचे तक्टे घेवन सरकाराचो निशेध करपाक सुरवात केली.
मात राज्यपालान आपलें भाशण चालूच दवरलें आनी सगल्या विरोधी आमदारांनी राज्यपालांच्या हौदात वचून धांव घेतली आनी बोवाळ घालपाक सुरवात केली. राज्यपालान तांकां आपली बसका घेवपाची विनंती केली. मात मागणी करून लेगीत विरोधकांनी बोवाळ सुरू केल्ल्यान सभापतीन तांकां सभाघरा भायर मारपाचो आदेश दिवन मार्शला वरवीं सगल्या आमदारांक सभाघरांतल्यान भायर काडले.
उपरांत विरोधी आमदारांच्या चेम्बरांत हे विशीं अदीक म्हायती दिवपा खातीर विरोधी आमदारांनी पत्रकार परिशद आपयली. ह्या वेळार युरी आलेमाव सयत, हळदोणचे आमदार कार्लुस फेरेरा, केपेंचे आमदार एल्टन डिकोस्टा, गोवा फॉरवर्डचे आमदार विजय सरदेसाय, आम आदमी पक्षाचे आमदार वेन्झी व्हिएगस, क्रुझ सिल्वा आनी आरजीपीचे आमदार विरेश बोरकार हजर आशिल्ले.
बर्च घडणुकेंत सरकारान २५ निश्पाप लोकांचो खून केला, असो आरोप आलेमाव हांणी ह्या वेळार केलो.
ज्या निश्पाप लोकांचो जीव गेलो तांचे खातीर आर्गां ओंपपाची मागणी करून हे घडणुकेचेर पयलीं उलोवपाची आमी मागणी केल्ली. मात जी स्क्रिप्ट सरकारान दिल्या तीच राज्यपाल वाचता. हे घडणुकेंत हडफडचे सरपंच, सचीव आनी हेर अधिकार्‍यांक बळीचे बोकडे केल्यात. हातूंत पंचायत मंत्री, पर्यावरण मंत्री आनी गृह मंत्री हांकां जापसालदार धरपाक जाय आसले, असो आरोप आलेमाव हांणी केलो.