भांगरभूंय | प्रतिनिधी
पणजी: गोंय विधानसभेच्या शिंयाळ्या अधिवेशनाची सुरवात राज्यपाल पुसापती अशोक गजपती राजू हांच्या अभिभाशणान जाली. आपल्या भाशणांत राज्यपालांनी गोंयचे पुराय उदरगतीचो आराखडो मांडटनाच, शासन विकास, जनकल्याण आनी सुरक्षेच्या मुद्यांचेर पुरायेन बांदिल आशिल्ल्याचें स्पश्ट केलें. राज्यान २०३७ मेरेन पुरायेन विकसीत जावपाचें लक्ष्य दवरलां, केंद्र सरकाराच्या ’विकसीत भारत २०४७’ हे मोहिमेक समांतर असो ’गोवा व्हिजन २०५०’ डॉक्युमेंट निमाण्या टप्प्यांत आशिल्ल्याची म्हायती तांणी दिली.
राज्यातील सामान्य नागरिकांच्या घराचें सपन पुराय करपा खातीर सरकारान सुरू केल्ले ‘म्हजें घर’ हे गृहनिर्माण येवजणेची राज्यपालांनी तोखणाय केली. बर्याच दसकां सावन स्वताच्या घरा खातीर वाट पळोवपी कुटुंबांची अनिश्चीतताय हे येवजणेक लागून पुराय जाल्ल्यान, हाका लागून लोकांचे जिवितांतलो मानाचो दर्जो आनी ’हॅप्पीनेस इंडेक्स’ सुधारपाक मजत जाली, असो विस्वास तांणी उक्तायलो. तिसर्या ’कुशावती’ जिल्ह्याक लागून प्रशासकीय कामांक गती मेळून पर्यटना वांगडाच मुळाव्या सुविधांची उदरगत जातली, आनी हाका लागून नागरिकांचो वेळ वाटवतलो अशें तांणी नमूद केलें. राज्यांतल्या १२ मदले ५ खाण ब्लॉक्स सुरू जाल्ल्यान सरकाराक २५२.८३ कोटींचो महसूल मेळ्ळा. उरिल्ल्या ७ ब्लॉक्सांची प्रक्रिया सुरू आशिल्ल्यान, १० डम्पच्या ई-पावणे खातीर निविदा जारी केल्ल्याचें राज्यपालांनी सांगलें.
राज्याचे अर्थीक स्थितीचेर उलयतना राज्यपालांनी सांगलें, केंद्रीय सांख्यिकी मंत्रालयाच्या अंदाजा प्रमाण २०२३-२४त गोंयान १४.९४ टक्के इतकी प्रभावी उदरगत केल्या. प्रधानमंत्री नरेंद्र मोदी हांणी लागू केल्ल्या जीएसटी सुधारणांक लागून वेपार करप सुरळीत जाल्ल्यान ताचो सकारात्मक परिणाम गोंयचे अर्थवेवस्थेचेर दिसता. साक्षरतेचे बाबतींतूय गोंयांन ९९.७२ टक्क्यां मेरेन उडी मारिल्ल्यान हें राज्याच्या प्रगत शिक्षणीक धोरणाचें येस जावन आसा.
सुरक्षेच्या आघाडीचेर गोंयान सामकी आस्वासक कामगिरी केल्ल्याचें सांगतना राज्यपालांनी नमूद केलें, राज्यांत ८७.७२ टक्के क्रायम डिटेक्शन रेट आसा. हो आंकडो पुलिसांचे सतर्कतेचें आनी नागरीक-केंद्रीत कार्यपद्धतीचें प्रतीक आसा. राज्यांतली कायदो आनी सुवेवस्था पुरायेन नियंत्रणांत आशिल्ल्या भौशीक सुरक्षितते खातीर सरकार गरजेचीं सगलीं पावलां उखलता, अशें आस्वासन तांणी सभाघरांत दिलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
