चिंचोण्यां बायपास रस्तो जायना जाल्यार देंवतले रस्त्यार

भांगरभूंय | प्रतिनिधी

चिंचोणकारांनी केली भुमिका स्पश्ट

मडगांव : राष्ट्रीय महामार्गावेल्या चिंचोणच्या बायपासची मागणी केल्ली आसतनाय फ्लायओव्हर उबारतात. हाका विरोध करपा खातीर चिंचणीचे नागरीक एकठांय आयिल्ले. सरकारान भुमिका स्पश्ट करची. बायपासची मागणी पुराय जायना जाल्यार रस्त्यार देंवपाची शिटकावणी थळाव्यांनी दिल्या.
चिंचोणच्या दांडोवाड्यार चिंचोणच्या नागरिकांनी एकठांय येवन मुखेल रस्तो रुंदीकरण करुन रस्तो नाका जाल्यार बायपास उबारपाची मागणी केली. ह्या वेळार आमदार क्रुझ सिल्वा, सरपंच फ्रँक व्हिएगस हांचे सयत थळावे हाजीर आशिल्ले. सरपंच फ्रँक हांणी सांगलें, २००७ सावन सर्वेक्षणा उपरांत ह्या प्रस्नाक सुरवात जाली. लोकांच्या विरोधा उपरांत २०१०त सरकारान बायपास करपाचें आस्वासन दिलें. सर्वेक्षणा उपरांत मॅपिंगूय जाल्लें. कोणाकूच सांगिनासतना २०१७त सरकारान परत बायपासाचो पर्याय सोडून मुखेल मार्गान रस्तो करपाचें थारायलें. उपरांत आदले मुख्यमंत्री मनोहर पर्रीकार हांकां मेळ्ळे उपरांत तांणीय बायपास करपाचें मान्य केल्लें. ११ किलोमीटर बायपास नाका जाल्यार फकत दोन किलोमीटर अंतराचो बायपास करचो अशी मागणी केल्या. बायपासा खातीर कोमुनिदादचो ना हरकत दाखलो घेतला. मात, तरी सरकार ह्याच मार्गार फ्लायओव्हर करपाक सोदिल्ल्यान थळाव्याक खुबशीं आडमेळीं येतलीं. हाका लागून सरकार बायपास करपाचें नासल्यार लोकांक रस्त्यार येवचें पडटलें, अशी शिटकावणी दिली.
राष्ट्रीय महामार्ग ६६ ची वस्तुस्थिती बांदकाम खात्यान जाणून घेवपाची गरज आसा. राज्य सरकारान थारायल्यार हो बायपास जावपाक शकता. मुख्यमंत्र्यांच्या सांगण्या प्रमाण ना हरकत दाखलोय केला. आमदार, खासदार हांचे कडेन निवेदनां सादर केल्यांत. चिंचोणेच्या लोकांक जावपी त्रास लक्षांत घेवन, तांकां फ्लायओव्हर नाका जाल्यार बायपास करचो, अशी मागणी फ्रँक व्हिएगस हांणी केली.
ह्या बायपासच्या प्रस्ना विशीं मुख्यमंत्री डॉ. प्रमोद सावंत हांकां मेळटले. तांच्या सांगण्या प्रमाण बायपासा खातीर कोमुनिदादचो ना हरकत दाखलोय हाडला. मंत्री दिगंबर कामत हांचे कडेनूय निवेदन सादर केलां. अधिवेशनांत हो प्रस्न मांडटले. चिंचणी नागरिकांची एकठांय बसका घेवन ह्या प्रस्नाचेर सरकारान भुमिका स्पश्ट करची. जी भुमिका लोकांची, पंचायतींची आसतली ताका आपलें फाटबळ आसतलें, अशें आमदार क्रुझ सिल्वा हांणी सांगलें.