सरस्वती बाय पुरस्कार सुवाळो रंगलो

भांगरभूंय | प्रतिनिधी

भांगरभूंय । खबरां मेज
पणजी : कोंकणी भाशा प्रचार सभेचो उत्कृष्ट कोंकणी साहित्यकृती खातीर आशिल्लो ‘एन. एम. सरस्वती बाय पुरस्कार’हालींच कोंकणी भाशा भवनांत घडोवन हाडिल्ल्या संमेलनांत वितरीत जालो.
एक प्रार्थनेन बसकेची सुरवात जाली. प्रचार सभेचे संयुक्त सचिव पी. सुरेश पै हांणी येवकार दिलो. कॅनरा बँकेचे निवृत्त उपसरवेवस्थापक जी. सन्नकुमार प्रभु हांणी कार्यावळीचें उक्तावण, तशेंच सभाघराच्या नांवाचें अनावरण केलें. 1966 वर्सा स्थापन जाल्ल्या कोंकणी भाशा प्रचार सभेच्या हिरक महोत्सवाक संबंदीत कार्यावळींत निवृत्त न्यायाधीश आनी कोंकणी भाषा प्रचार सभेचे अध्यक्ष मनोहर एस. किणी संमेलनाचे अध्यक्ष आसले. तिरुवनन्तपुरम दूरदर्शन केन्द्राचे सह संचालक डॉ. पी. आर. हरीन्द्र शर्मा मुखेल सोयर आशिल्ले.

कोंकणी शिक्षक विद्यालयाची प्राचार्य राणी रामकृष्ण किणी हांणी सौ. संपदा विष्णु सवासे (गोंय) हांकां एन. एम. सरस्वती बाय पुरस्कार भेटयलो. ‘अमुल्य देण’ ह्या पुस्तका खातीर हो पुरस्कार दिला. 25 हजार रुपया आनी प्रशस्तीपत्र अशें ह्या पुरस्काराचें स्वरुप आसा.

उपरांत, पद्मश्री एन. पुरुषोत्तम मल्ल्या हांणी बरयिल्ल्या ‘कोच्ची केरळेश्वर शिवक्षेत्र चरित्र’ ह्या लघु पुस्तकाचें प्रकाशन केंद्रीय साहित्य अकादेमी पुरस्कार विजेता शरतचन्द्र शेणाॅय हांणी केलें. सुधीश एस. शणै हांणी पुरस्कार विजेतीची वळख करून दिली.
कोंकणी केन्द्र गोश्रीपुर संस्थेचे अध्यक्ष जी. मोहन शेणाॅय हाणी येवकार दिलो. प्रचार सभेचे कोशाध्यक्ष मनोहर आर शेणाॅय हाणी उपकार मानले. सभा कार्यक्रमा उपरांत भुरग्यांली सांस्कृतीक कार्यावळ जाली.