भांगरभूंय | प्रतिनिधी
मडगांव : राज्यांत रस्त्यांचें खणपाचें काम चल्लां ताचो अहवाल मागयला. मे म्हयन्या मेरेन सगलीं कामां पुराय करपाच्यो सुचवण्यो केल्यात. ताचे उपरांत कोणाकूच राज्यांतलो एक पसून रस्तो खणपाक दिवचों ना, अशें बांदकाम मंत्री दिगंबर कामत हांणी सांगलें.
मडगांवां राष्ट्रीय युवा दिसाचे कार्यावळी उपरांत प्रसारमाध्यमां कडेन उलयतना मंत्री दिगंबर कामत हांणी सांगलें, मे म्हयन्या उपरांत केबल्स घालपाक रस्ते खणपाचें काम करपाक परवानगी दिवचों ना. हांव आतां बांदकाम मंत्री आशिल्ल्यान प्रस्न मांडचों ना. निर्णय घेवपाचे अधिकार आशिल्ल्यान विरोधकांनी केल्ल्या प्रस्नाच्यो जापो दितलों. मडगांव वाठारा खातीर गरजेचीं सगलीं कामां चालीक लायल्यांत. चडशीं कामां सुरुय जाल्यांत. राज्यांत सगले कडेन रस्त्यांचे दुरुस्तीचीं कामां नेटान सुरू आसात. मुखेल रस्त्याचें काम मुखेलपणान केलां. जंय फोंडकूल आसात थंय कामां चालू आसात. नावेले मतदारसंघांतल्या रस्त्यांच्या कामांची पळोवणी केल्ल्यान ते सुवातेर जमनी पोंदच्यान उदकाचीं पायपां घालपाचें आनी लायटीच्यो सरयो घालपाचें काम आजूनय चालूच आसा. हाका लागून रस्ते दुरुस्त करपाक कळाव जाता. रस्त्याच्या कामां विशींचो अहवाल मागयला. जीं कामां सुरू आसात, तीं मे म्हयन्या पयलीं पुराय करपाच्यो सुचवण्यो केल्यात. उपरांत कोणाकूच केबल्स वा हेर कसल्याच कामां खातीर रस्ते खणपाक हांव दिवचो ना. मे म्हयन्यांत राज्यांतले सगले रस्ते हॉटमिक्सींग पद्दतीन गुळगुळीत करतले, अशें मंत्री कामत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
