ह्यो वेबसायटी चुकोवं नाकात

भांगरभूंय | प्रतिनिधी

आयजकाल इंटरनेट वेबसायटी खूब उपेगी जाल्यात. करियरा भितर कसल्यो संदी आसात, त्यो पळोवपाक ह्यो वेबसायटी चाळपाक जाय. म्हज्या करियराक खंयची सायट उपेगी आसा, हें जो पारखिता, ताका ताचो लाव मेळूं शकता. तुमी स्वयं हें नांव आयकलां आसतलेंच, केंद्र सरकारान ही सायट फुकट कोर्सा खातीर सुरू केल्या. फक्त शिकपाचो हांवेस जाय. ही माची अशें म्हणल्यार ती अतिताय थारची ना. ह्या पोर्टलाचेर जायते कोर्स आसात. ताची व्हडली वळेरीच आसा. तातूंतलो तुमचे आवडीचो कोर्स सोदून तो घेवपाचो. ते आयटीआयनीं सुरू केल्यात. गोंयांत लेगीत केंद्र आसा. थंय तुमकां नोंदणी करची पडटा. मागीरुच तुमकां भितर वांटेकार जावंक मेळटा.
ईडी एक्स ही शिक्षणीक सायट. ती उंचेल्या शिक्षणा खातीर लोकप्रीय आसा. फक्त करियराचें पळयलें म्हूण जायना तर शिक्षणीक मळाचेर कितें चल्लां ताचेर नदर आसप गरजेचें. ईडी एक्स हे सायटीचेर तुमकां वेवसाय कसो करचो हें शिकपाक मेळटा.
सध्या एआयची चर्चा आसा, तें लेगीत येवपाक जाय. आमच्या शाळांनी कोडींग शिकयतात, तें काम खाशेलो संगणक शिक्षक शिकयता. तरी लेगीत तुमी चड शिकचें म्हूण ही सायट आसा. स्क्रेच अशें तिचें नांव. तुमच्या शिक्षका कडेन ताची चवकशी करात. अशीच एक सायट आसा, खान अकादेमी, जाका अमेरिकन संगणक तज्ञ एलन मस्क हांची भरपूर मदत जाहीर जाल्या. हिचेर तुमकां खूब कितें शिकपाक मेळटा. ते खेरीज कोर्सेराची सायट तुमकां मुफत कोर्स करपाची संद दिता. ही एक विदेशी सायट. हातूंत जो कोर्स तुमी वेंचून काडटात, ताच्या व्हिडियो वयल्यान तुमी अभ्यास करपाक शकतात. अमूक वरां तुमी दिवपाक जाय. ब्रेन पाॅप नांवा वयल्यानूच ही एक प्रस्नरुपी सायट आसा, हें कळटा. मुखेल गजाल म्हणल्यार हांगा एनिमेटेड व्हिडियो पळोवपाक मेळटात.
तश्यो सायटी खूब आसात. पूण हांवें फक्त मुफत आनी परवडपा सारक्यो सायटी तुमकां दिल्यात. बऱ्योच सायटी फी घेवनूय शिकयतात. गणिता वयली एक फुकट सायट आसा. तिचो तुमी शिकपा खातीर जरूर वापर करचो. प्रोडिजी मेथ गेम अशें तिचें नांव. तुमची गणिताची भिरांत वचूं शकता. सामान्य गिन्यान कित्याक जाय हें वेगळें सांगपाक नाका. भांगरभूंय दर आयताराक प्रस्न विचारतात आनी ताची जापूय दितात. हातूंत तुमच्या गिन्यानांत भर पडटा, हातूंत दुबाव ना. सगलें कितें आमकां खबर आसतलेंच अशें ना. पूण निदान चार गजाली आमी नदरे खाला घालपाक जाय. हें साहित्य कोंकणींत हाडपाचो यत्न केल्यार ताचो लाव सगल्यांकूच जावं येता. गोंयांत हुशार भुरगे आसात. फुडलें शिक्षण ते मायभाशेंतल्यान घेतले. गोंयांतल्या गोंयांत आतां चडशे कोर्स करपाक मेळटात. शेती, अभियांत्रिकी, वेट शिक्षण, फुडल्या वर्सा नुस्त्याचें शिकप दिवपी काॅलेज येतली. हे अभ्यासक्रम गरजेचे. नुस्त्याची काॅलेज म्हत्वाची कारण गोंयांत 105 किलोमिटर लांब दर्यादेग आसा. हांगा लोक जशे पिवपाक येतात, तशे नुस्तें खावपाकूय येतात. तेन्ना तुमकां तांकां दिवपाक नुस्तें वळखूंक येवपाक जाय. प्राणी, सुकणी, नुस्तें हाचे विशींचे अभ्यासक्रम आमी शिकले काय आमकां प्राण्यांचें म्हत्व कळटलें. मागीर आमी रस्त्यांचेर गोरवां सोडचे नात, सुणीं लेगीत थंय दिसची नात. आदल्या तेंपार सोरोप दिसले काय आमी मारताले, मात आतां ताका आमी धरपाक लायतात. हाचो अर्थ आमची मानसिकताय बदलता. विविध अभ्यासक्रमाच्यो काॅलेजी, विशय सुरू जाले काय ती आनीक बदलतली. वेगवेगळे अभ्यासक्रम सुरू करपाचो यत्न केल्ल्यान मानादिक मुख्यमंत्री डाॅ. प्रमोदजी सावंत हांकां देव बरें करूं.