कोंकणी नेटान फुडें व्हरपाक जागृती गरजेची

भांगरभूंय | प्रतिनिधी

प्रेमेंद्र शेट : ‘बिम्बा’च्या रुप्या महोत्सवी भतग्राम म्हयन्याळ्याचें लोकार्पण

भांगरभूंय । प्रतिनिधी

दिवचल : कोंकणी भाशा साहित्य आनीक नेटान फुडें व्हरचे खातीर मुळाव्या पांवड्यार जागृती गरजेची आसा. साहित्य निर्मितीच्या माध्यमांतल्यान संस्कृतीची वळख घटमूट जाता. आयज मनीस शेणत चल्ला, अश्या वेळार नवनिर्मितीचो ध्यास घेवन साहित्य वाचनांतल्यान समाजांत बरेंपणा, थिराय जागृत दवरपाची गरज आसा, अशें मयेंचे आमदार प्रेमेंद्र शेट हांणी सांगलें. ह्या वेळार तांणी दिलीप बोरकार हांच्या वावराचें कवतूक केलें.

बिम्ब परिवार, दिवचल कोंकणी सेवा केंद्र आनी कोंकणी सेवा केंद्र सांखळी हांच्या जोडपालवान बिम्ब म्हयन्याळाचो रुप्या महोत्सवी बिम्ब भतग्राम विशेशांकाचें लोकार्पण प्रेमेंद्र शेट आनी मानेस्तांचे हस्तुकीं जालें. ह्या वेळार शेट उलयताले.

दिवचलच्या छत्रपती शिवाजी महाराज सरकारी शाळा संकुल सभाघरांत आयोजीत केल्ले हे कार्यावळीक नगराध्यक्ष विजय कुमार नाटेकार, बिम्बाचे संपादक दिलीप बोरकार, रुपेश ठाणेकार, श्याम फातर्पेकार, विनायक गोवेकार, डॉ. वामन नायक उपस्थीत आशिल्ले.

दिलीप बोरकार हांणी बिम्ब म्हयन्याळ्याचे 25 वर्सांचे वाटचालीचो नियाळ घेतलो. गोंयकारपण आयज शेणत चल्लां. सगल्यांनी संघटीत जावपाची गरज आसा. शणै गोंयबाब हांणी खऱ्या अर्थान गोंयची अस्मिताय राखतना आयज कोंकणी मनशान सन्मानान जगपाची प्रेरणा दिली. विवीध लेखकांनी बिम्बांत लेखन करतना आयज मेरेन 214 पुस्तकां उजवाडाक हाडलीं, अशें बोरकार हांणी सांगलें. दर म्हयन्याक दरेका म्हालांत हे प्रमाण हाचे मुखार बिम्ब म्हयनाळें काडपाचो निश्चेव तांणी ह्या वेळार जाहीर केलो.

ह्या वेळार बाल साहित्या खातीर साहित्य अकादेमी पुरस्कार फावो जाल्ली हर्षा शेट्ये हांच्या पुस्तकाचें लोकार्पण तशेंच तांचो सन्मान केलो. तेचवरी कोंकणी खातीर योगदान दिल्ले विनायक गोवेकार, उदय सरदेसाय, कृष्णनाथ फोगेरी, सदाशीव वालावलकार, मंगेश खाडये, केजिटन वाझ, प्रदीप लवंदे, राजन शेट्ये, अनील वेर्णेकार, श्याम फातर्पेकार, आग्नेल डिसिल्वा, गजानन नागवेंकार, अनुराधा, सदानंद काणेकार हांचो सत्कार केलो.

कृष्णनाथ फोगेरी, विनायक गोवेकार, अनील वेर्णेकार हांणी आपले विचार मांडले.

रुपेश ठाणेकार हांणी येवकाराच्या उलोवपांत कोंकणी म्हयन्याळे बिम्ब 25 वर्सां पुराय करता, कोंकणीचो वावर अदीक नेटान फुडें व्हरचे खातीर संघटीत यत्न करपाचो उलो मारलो.

समारोप सुवाळ्यांत आदले आमदार प्रवीण झांट्ये हांणी मार्गदर्शन केलें आनी शुभेत्सा दिल्यो. गोवा कोंकणी अकादमीचे अध्यक्ष डॉ. पूर्णानंद च्यारी हांणीय कोंकणी मोगींक मार्गदर्शन केलें. डॉ. वामन नायक हांणी आपले खाशेले विचार मांडले. ह्या वेळार प्रस्नमंजुशा आनी कवी संमेलन आयोजीत केल्लें. सुत्रसंचालन डॉ. प्रवीण सावंत आनी तन्वी पळ हांणी केलें.