भांगरभूंय | प्रतिनिधी
नवी दिल्ली: दिल्ली पुलीस स्पेशल सेलच्या आयएफएसओ युनिटान व्हड ‘डिजिटल ऍरेस्ट’ सायबर फटवणूक रॅकेट उक्तडार हाडून पांच आरोपींक अटक केल्या. धक्को दिवपी गजाल म्हणल्यार ह्या प्रकरणांत येस बँकेच्या दोन अधिकार्यांचोय आस्पाव आसा. तांचेर बनावट कागदपत्रांच्या आदाराचेर बँक खातीं उगडून फटींगपणाची रक्कम लिपोवंक मजत केल्ल्याचो आरोप आसा.
८० वर्सां पिरायेच्या जोडप्यान कागाळ केल्या उपरांत हें प्रकरण उक्तडार आयलें. ट्राय, दिल्ली पुलीस आनी सीबीआयचे अधिकारी म्हूण सांगून फटोवप्यांनी व्हॉट्सऍप कॉला वरवीं तांचे कडेन संपर्क केलो. तांणी पिडेस्तांचो मोबायल नंबर आनी आधार कार्ड चुकीच्या कामांत वापरिल्ल्याचो दावो केलो आनी ताचे आड जायते एफआयआर नोंद जाल्यात अशें सांगलें.
फटोवप्यांनी ह्या जाण्ट्या जोडप्याक सात दीस ‘डिजिटल ऍरेस्टांत दवरलें. व्हॉट्सऍप व्हिडियो कॉला वरवीं तांचेर सेगीत ते नदर दवरताले. हाका लागून तांकां घरांतल्यान भायर सरपाक वा कोणा कडेन संपर्क करपाक मेळनाशिल्लें. भंय निर्माण करपा खातीर सीबीआय ऑफिस सारको बनावट सेटअप स्थापन केलो आनी एका मनशाक वकील म्हणून सादर केलो.
सेगीत करप चेंपण आनी भंयाक लागून पिडेस्त जोडप्यान आपली स्थिर ठेवी मोडली, आयुश्यभरांतली बचत हस्तांतरीत केली आनी भांगराचेर रीण लेगीत घेतलें. चवकशी उपरांत पुराय रक्कम परत दितले अशें उतर दिवन वट्ट रु. ९६ लाखांची फटवणूक जाली.
ह्या प्रकरणांत ४ नोव्हेंबराक ई-एफआयआर दाखल केल्लो. डीसीपी आयएफएसओ विनीत कुमार (आयपीएस) हांच्या फुडारपणा खाला बँक खातीं, डिजिटल पावलांचे छाप आनी तंत्रीक पुराव्यांचें पुराय विश्लेशण केलें. तपासांतल्यान प्रदीप कुमार (हिसार) आनी उपरांत नमनदीप मलिक हांकां अटक जाली. उपरांत फटीची जीएसटी नोंदणी आनी पयशांचे लेयरिंग करपी भुवनेश्वरांतल्यान शशिकांत पटनायकाक अटक केली.
चवकशेंत येस बँक, तिलक नगर शाखेच्या दोन अधिकार्यांनी निलेश कुमार (वरिश्ठ विक्री वेवस्थापक) आनी चंदन कुमार (विक्री अधिकारी चालू खातें) हांणी बनावट कागदपत्रांचेर चालू खातें उगडलें अशें दिसून आयलें. सायबर फटवणूकांतल्यान मेळपी येणावळ वळोवपा खातीर ह्या खात्यांचो वापर केल्लो. ह्या दोगांयकय अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
