भांगरभूंय | प्रतिनिधी
पांच जाण आयल्यार चर्चेक तयार : रूडॉल्फ
पणजी : आमदार रूडॉल्फ फर्नांडीस हांणी युनिटी मॉलाविशींची आपली भुमिका स्पश्ट करची. आमदार सरकारा सयत आसा काय चिंबलाच्या लोकां सयत आसा, तें ताणी सांगचें अशी मागणी करीत चिंबलच्या ग्रामस्थांनी आमदार रूडॉल्फ फर्नांडीस हांच्या कार्यालया भायर निदर्शनां केलीं.
‘‘भायर यो, भायर यो…, आमकां नाका, आमकां नाका, युनिटी मॉल आमकां नाका…’’ अश्यो घोशणा दीत गांवकारांनी युनिटी मॉलाक विरोध केलो.
जैवविविधता समितीचे अध्यक्ष गोविंद शिरोडकार हांच्या फुडारपणा खाला गांवकारांनी निदर्शनां केलीं. आंदोलकांनी पदां म्हणून आमदाराचो, पंचाचो निशेद केलो. पयलीं ज्या जाग्यार आयटी पार्क जावपाचे आशिल्लें त्या जाग्यार युनिटी मॉल कसो आयलो? खंयचेच स्थितींत युनिटी मॉल आमकां नाका, अशी खर भुमिका आंदोलनकर्त्यांनी मांडली. ह्या वेळार गोविंद शिरोडकार, अजय खोलकार तशेंच हेरांचीं भाशणां जालीं.
युनिटी मॉला आड २८ डिसेंबर सावन चिंबल ग्रामस्थांचें आंदोलन सुरू आसा. फाटल्या आयतारा तोयार तळ्या लागसार जाहीर सभा जाली. हाचे उपरांत आयज आमदार रूडॉल्फ फर्नांडिस हांचया कार्यालया भायर निदर्शनां जालीं.
सगळ्या लोकां कडेन उलोवंक शकना, पांच
जाणां कडेन उलोवपाची तयारी : रूडॉल्फ
युनिटी मॉलाआड आंदोलन करपी लोक आयज मेरेन म्हजे कडेन चर्चा करपाक येवंक नात. हांव सगळ्या लोकां कडेन उलोवंक शकना. आयज लेगीत ५ जाण आयल्ले जाल्यार तांचें कडेन चर्चा करपाची म्हजी तयारी आसा, अशें आमदार रूडॉल्फ फर्नांडीस हांणी सांगलें. ते गाळी मारतात, कितेंय उलयतात, हे खातीर हांव थंय वच्चो ना. मोगान पयलींच आयिल्ले जाल्यार हांव उलयतां आसलों. तोयार तळ्याक हांव किदेंच जावपाक दिवचों ना. तोयार तळें सुरक्षीत उरतलें, अशें मुख्यमंत्री डॉ. प्रमोद सावंत हांणी लेगीत आस्वासन दिलां. प्रकल्पाक मान्यताय दिवचे पयलीं सरकारान लोकांक विस्वासांत घेवपाक जाय आसलें, अशें रूडॉल्फ फर्नांडीस हांणी सांगलें.
आरजीचे कांय फुडारी हिंसक वागतात. तांकां कोण पयशे दिता तें म्हाका खबर आसा. योग्य वेळार हांव नांवां सांगतलों. आरजीचे फुडारी हे जमिनींचे दलाल जाल्यातः आमदार रूडॉल्फ फर्नांडीस हांचो आरोप.
आरजीचे फुडारी जमनीचे दलाल
आरजीचे फुडारी हे हिंसक तरेन वागतात. तांकां कोण पयशे दिता तें म्हाका खबर आसा. योग्य वेळार हांव नांवां सांगतलों. आरजीचे फुडारी हे जमिनींचे दलाल जाल्यात, असो आरोप आमदार रूडॉल्फ फर्नांडीस हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
