भांगरभूंय | प्रतिनिधी
वाळपय: जमनी पोंदच्यो लायटीच्यो सरयो आनी उदकाचीं पायपां घालपाक वाळपय नगरपालिका वाठारांत रस्ते खणिल्ल्यान हांगच्या गटारांची बाबत अवस्था जाल्या. माती आनी फातर घालून हांगचीं गटारां पुरयल्यांत. नागरिकांक पावसांत हाचे वायट परिणाम सोंसचे पडटले. हाका लागून पावसा पयलीं हीं गटारां नितळ करचीं. मातयेन पुरिल्ली गटारां उसपुवचीं, अशे तरेची मागणी नागरीक करतात.
हे विशीं चड म्हायती प्रमाण, फाटल्या दोन म्हयन्यां सावन वाळपय नगरपालिका वाठारांत जमनी पोंदच्यान लायटीच्यो सरयो आनी उदाचीं पायपां घालपाचें काम नेटान सुरू आसा. सगलेच रस्ते खणल्यात. वाळपय शाराची अवस्था सामकी वायट जाल्या. सेगीत येरादारीची कोयंडी जाता. रस्ते जाल्ल्यान नागरिकांकक बरेच त्रास सोंसचे पडटात.
मजगतीं, खणिल्ल्या रस्त्याचें दुरुस्ती काम सुरू जालां. हाका लागून नागरिक समाधानी जाल्यात. दुरुस्तीचें काम हातांत घेतलां. मात हांगा वेवस्थीत दुरुस्ती करपाची गरज आसा. जंय दुरुस्तीचें काम केलां थंय फकत माती घालून दवरल्या. हे सुवातेर बेगोबेग डांबरीकरण करपाची गरज आसा. ना जाल्यार समस्या निर्माण जातल्यो.
गटारां मातयेन भरल्यांत
रस्ते खणटना हांगचीं गटारां माती आनी फातरांनी पुरोवन उडयल्यांत. हीं गटारां बेगोबेग साफ करपाची गरज आसा. ना जाल्यार पावसांत हाचो त्रास लोकांक सोसचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
