आपाचे नवे अधिकृत कार्यकारिणीची घोशणा: प्रदेशाध्यक्षपदार वाल्मिकी नायक

भांगरभूंय | प्रतिनिधी

पणजी: झेडपी वेंचणुकेंत अपेसाक तोंड दिले उपरांत खुबश्या भितरल्या आव्हानांक तोंड दिवपी आम आदमी पक्षान (आप) गोंयांत आपली संघटणा नव्यान बांदल्या. पक्षाच्या केंद्रीय राजकीय वेव्हार समितीन (PAC) आयतार, ११ जानेवारी २०२६ दिसा गोंयां खातीर नवे अधिकृत कार्यकारिणीची घोशणा केली. हातूंत बर्‍याच काळा सावन पक्षा कडेन एकनिश्ठ राविल्ले वाल्मिकी नायक हांची प्रदेशाध्यक्षपदार निव करून पक्षान नव्या आनी विस्वासू नेतृत्वाचेर विस्वास दाखयलो. हे नवे कार्यकारिणीत संघटनात्मक घटमुटपणा खातीर म्हत्वाचे बदल घडयल्यात.
गर्सन गोम्स हांची राज्याचे कार्याध्यक्ष म्हणून नियुक्ती केली. ते वाल्मिकी नायक हांचे वांगडा संघटणा वाडोवपाक काम करतले. तशेंच, जमीन पांवड्यार पक्षाक आनीक घटमूट करपा खातीर प्रशांत नायक हांचे कडेन ’राज्य संघटणा सचीव’ हें जापसालदारीचें पद दिलां. तशेंच ज्येश्ठ फुडारी संदेश तळेकार देसाय हांकां ’राज्य वरिश्ठ उपाध्यक्ष’ म्हणून बढती दिवन अणभवी आशिल्ल्यांक सक्रीय दवरपाचो यत्न पक्षान केला.
ही नवी टीम जाहीर जावपाच्या फाटल्यान पक्षाची गोवा प्रभारी आतिशी हांच्या तीन दिसांच्या गोंय दौर्‍याचो व्हड वांटो आसा. आतिशी हांणी राज्यांतल्या विवीध मतदारसंघांतल्या कार्यकर्त्यां कडेन सरळ संवाद करून तांच्यो समस्या जाणून घेतिल्ल्यो. हालींच जाल्ल्या जिल्लो पंचायत वेंचणुकेंत पक्षाक ५० मदल्या फकत एके सुवातेर यश मेळ्ळें.ह्या अपेसा उपरांत अमित पालेकार, श्रीकृष्ण परब, उपाध्यक्ष चेतन कामत आनी युवा अध्यक्ष रोहन नायक ह्या फुडार्‍यांनी सामुहीक राजीनामे दिल्ल्यान पक्षांत व्हड नेतृत्व संकट निर्माण जाल्लें.
श्रीकृष्ण परब हांणी आपल्या राजीनाम्यांत पक्षाच्या अपारदर्शक कार्यपद्धतीचेर आनी अमित पालेकार हांकां काडपाचे पद्धतीचेर खर तिडक उक्तायल्ली. हे फाटभूंयेर कार्यकर्त्यांमदीं निर्माण जाल्ले गैरसमज पयस करप आनी विस्कटिल्लो वेळ परत सारको बसोवप हें नव्या प्रदेशाध्यक्ष वाल्मिकी नायक हांचे मुखार व्हड आव्सान आसतलें. भ्रश्टाचाराचे मुद्दे आनी थळाव्या जनतेच्या समस्यांक समजून येवपी विधानसभा वेंचणुके खातीर सज्ज जावपाचो निर्धार नवे टिमीन उक्तायलो. राष्ट्रीय सरचिटणीस डॉ. संदीप पाठक आनी प्रभारी आतिशी हांणी ह्या बदलांक दिल्लीच्यान पांचवो बावटो दाखयला.