‘जीरामजी’ गांवगिऱ्या वाठारांत दितली हक्काचें काम

भांगरभूंय | प्रतिनिधी

भाजप : आदले मनरेगा येवजणे परस चड प्रभावी

भांगरभूंय । प्रतिनिधी

पणजी : संसदेंत मंजूर जाल्ले विकसीत भारत जीरामजी येवजणे संबंदांत विरोधी पक्ष चुकीचो समज पातळयतात. मुळांत ही येवजण आदींचे मनरेगा येवजणे परस अदीक प्रभावी आसा. हाका लागून गांवगिऱ्या वाठारांतल्या लोकांक हक्काचें काम तशेंच मोबदलो मेळटलो, अशें भाजप फुडारी नरेंद्र सावयकार हांणी सांगलें. शेनवारा पणजे घेतिल्ले पत्रकार परिशदेंत ते उलयताले. ह्या वेळार केंद्रीय मंत्री श्रीपाद नायक आनी हेर पदाधिकारी हाजीर आशिल्ले.

सावयकार हांणी सांगलें, आदले येवजणेंत 100 दिसांचो रोजगार मेळटालो. नवे येवजणेंत हो काळ वाडोवन 125 दीस केला. नवे येवजणेंत उदक सुविधा, मुळाव्यो सुविधा, पर्यावरण, कामाचो हक्क हाचेर मुखेलपणान भर दिला. येवजणे प्रमाण 33 टक्के काम बायलांक दितले. येवजणे खातीर केंद्रा कडल्यान 60 टक्के निधी दितले, जाल्यार 40 टक्के रकम राज्य सरकाराक खर्च करची पडटली. आदीचें येवजणेंत अश्यो कसल्योच तजविजो नाशिल्ल्यो.

नवे येवजणेंत एआय तंत्रज्ञान, डिजिटल मॅपींग हांचो वापर कररतले. ताका लागून काम करप्यांक थेट निधी मेळपाक मजत मेळटली. हाका लागून कामाची प्रक्रिया अदीक पारदर्शक जातली. आदींचे येवजणेंत भ्रश्टाचार जाल्ल्याचे आरोप जाल्ले. निधी केन्ना मेळत हाचो नेम नाशिल्लो. हे टाळपा खातीरूच येवजणेंत गरजेचे बदल केल्यात. फुडल्या तीन म्हयन्यांत पक्षा वतीन पुराय गोंयांत हे येवजणे संबंदांत जागृती करतले, अशें सावयकार हांणी सांगलें.

केंद्रीय मंत्री श्रीपाद नायक हांणी सांगलें, हे आदीं मनरेगा खाला सरसकट कामां करताले, मात आतां गांव पांवड्यार थंयच्या अडचणींचो विचार करून कामां करतले. थारावीक गांवाक कितें जाय हें पळोवनूच उदरगतीचीं कामां करतले. खंयचे काम करपाचें हें राज्य वा केंद्र सरकारा परस गांव पांवड्याचेर थारायतलें, ही येवकार दिवपा सारकी गजाल आसा. नवे येवजणेक लागून अंत्योदय उदरगतीक खऱ्या अर्थान चालना मेळटली.

फक्त विरोधा खातीर विरोध नाका : श्रीपाद नायक

उदरगतीचीं कामां करतना कांय जाणांक हाका विरोध आसता, हें मान्य आसा. अश्या लोकांनी राज्य सरकारा वांगडा चर्चा करून मार्ग काडचो. फक्त विरोधा खातीर विरोध करप योग्य ना, अशें केंद्रीय मंत्री श्रीपाद नायक हांणी सांगलें.