भांगरभूंय | प्रतिनिधी
भारतनॅट येवजणे खाला अंमलबजावणी
भांगरभूंय । प्रतिनिधी
पणजी : तीन वर्सांच्या काळा भितर गोंयच्या सगल्या ग्रामपंचायतींनी बीएसएनएलच्या भारतनॅट प्रकल्पा खाला ऑप्टीकल फायबर इंटरनॅटाचें कनेक्शन मेळटलें. सगल्या पंचायतींचें सर्वेक्षण पुराय जालां आनी रोखडेंच कनेक्शन दिवपाचें काम चालीक लागतलें, अशी म्हायती बीएसएनएलच्या गोंय संचार भवनांतल्या वरिश्ठ अधिकाऱ्यान दिल्या.
हे विशीं अधिकाऱ्यान अदीक म्हायती दितना सांगलें, भारतनॅट येवजणेंत नवी सुदारणा केल्या आनी आतां मेरेन एकूय पंचायतीक हे येवजणे खाला इंटरनॅट कनेक्शन दिवंक ना.
12 म्हालांतल्या सगल्या 191 पंचायतींचें भौतीक सर्वेक्षण डिसेंबर 2025 मेरेन पुराय जालां. सगल्यो वैधानीक आनी प्रशासकीय गरजो पुराय केले उपरांत भारतनॅट येवजणेची अंमलबजावणी 2026 सावन सुरू जातली, अशें अधिकाऱ्यान सांगलें.
इंटरनॅट जोडणी दिवपाचें काम पांवड्या- पावंड्यार हातांत घेवन सगल्या पंचायतींक तीन वर्सांच्या काळा भितर फायबर इंटरनॅट जोडणी दितले. हे येवजणे खातीर येवपी अडचणी पयस करपा खातीर रायट ऑफ वे दाखलो मेळोवपाक बीएसएनएल संबंदीत अधिकाऱ्यांची भेट घेत आसात आनी दर ग्राम पंचायतीक इलेक्ट्रीकल उपकरणांचें कनेक्शन दिवपा खातीर यत्न करतात, अशी म्हायती अधिकाऱ्यान दिली. मजगतीं, गोंयांतल्या चडश्या पंचायतींनी बीएसएनएलची वाट पळयनासतना खाजगी टॅलिकॉम ऑपरेटर्सां कडल्यान फायबर इंटरनॅट सुविधेचें कनेक्शन घेतलां. कांय पंचायतींचें कामकाज हें डिजिटल जावन ऑनलायन घरपटी, परवानगी, दाखले दिवपाक सुरू केलां, पूण चडशे दर्यादेग वाठारांत आनी शारिकरणाच्या मार्गार आशिल्ल्या पंचायतीं कडेनूच ही सुविधा उपलब्ध आसा. गोंयच्या गांवगिऱ्या वाठारांतल्या पंचायतींनी अजूनय इंटरनॅट कनेक्शन अपेक्षीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
