भांगरभूंय | प्रतिनिधी
मडगांवः दाल्गादो कोंकणी अकादमीचो दाल्गादो पुरस्कार 2025 कार्यावळ मडगांव रवींद्र भवनांत 31 जानेवारीक सांजेच्या 4 वरांचेर जातलो. कार्यावळींत वेगवेगळ्या मळा वयल्या स व्यक्तींक पुरस्कार दितले. ही म्हायती दाल्गादो कोंकणी अकादमीचे अध्यक्ष सेल्सो फर्नांडीस हांणी दिली.
मडगांवांत जाल्ले पत्रकार परिशदेंत फर्नांडीस हांणी दाल्गादो पुरस्कारांची घोशणा केली. दाल्गादो कोंकणी अकादमी कोंकणी भास, संस्कृताय आनी दायजा खातीर वावुरता अशें फर्नांडीस हांणी सांगलें. दाल्गादो अकादमी साहित्य आनी संस्कृतीच्या मळार वावर केल्ल्या व्यक्तींचो भोवमान करता. दाल्गादो जीवन गौरव पुरस्कार तोमाझिनो कार्दोज, साहित्य पुरस्कार विन्सी क्वाद्रोस, रोमी कोंकणी सेवा पुरस्कार आल्फ्रेड जुडास वाझ, सांस्कृतीक पुरस्कार प्लाटिल्डा डायस, फा. फ्रेडी जे. दा कॉस्ता पत्रकारिता पुरस्कार डॅनिअल डिसोझा, जोएल डिसोझा दायज पुरस्कार मिंगेल ब्रागांझा, ब्रेटा मिनेझिस अस्तुरी पुरस्कार संध्या फर्नांडीस हांकां दितले. ह्या कार्यावळींक भाजपा प्रदेशाध्यक्ष दामू नायक, रोमी कोंकणी लेखक फा. ज्योकीम परेरा हाजीर आसतले.
फाटल्या वर्सा राज्य सरकारान राज्य पांवड्यार जनमत कौल करपाचो निर्णय घेतिल्लो आनी ते प्रमाण कार्यावळी घडोवन हाडिल्यो. अंदूंय दाल्गादो कोंकणी अकादेमी 16 जानेवारीक अस्मिताय दीस मनयतली. त्या निमतान सकाळीं 10 वरांचेर कासावली इगर्जेच्या सभाघरांत कांतारांची सकाळ कार्यावळ जातली. तशेंच सांजवेळा 4 वरांचेर पणजेंत कांतरांची सांज कार्यावळ जातली. थंय उच्च माध्यमीक विद्यार्थ्यां खातीर कविता सादरीकरण सर्त आयोजीत करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
