गुजरातांत वागाची 37 कात आनी 133 नाखटां जप्त

भांगरभूंय | प्रतिनिधी

नर्मदा, खबरां संस्थाः गुजरातांतल्या नर्मदा जिल्ह्यांतल्या राजपिपला शारा लागसार आशिल्ल्या प्रसिद्ध धर्मेश्वर महादेव देवळाच्या पोरणे इमारतींतल्यान वागांची 37 कात आनी 133 नाखटां जप्त केल्यात. कात आनी नाखटां 30 ते 35 वर्सां पोरणी आशिल्ल्याचो अदमास रानां खात्यान उक्तायलां. पूण रानां खात्यान तांची तपासणी करपा खातीर नमुने रानां सेवा विभाग (एफएसएल) कडेन धाडल्या.
राजपिपला शारांतल्या हनुमान धर्मेश्वर देवळाच्या आवारांत पोरणें घराची दुरुस्ती करतना दुर्गंधी आयिल्ल्यान देवळाच्या विश्वस्तांनी रानां खात्याक म्हायती दिली. ते उपरांत रानां खात्याचो पंगड घडणुकेचे सुवातेर पावलो आनी एका कुडींतल्यान वागांची कात आनी नाखटां भरून आशिल्ली पेटी काडली.

रानां खात्याच्या पंगडान थंयच्यान 37 पुराय कात, 4 कातीचे कुडके आनी सुमार 133 वागांची नाखटां जप्त केल्यात. कात आनी नाखटां एफएसएल तापसणी खातीर धाडल्यात. प्राथमीक तपासणी प्रमाण ह्यो कात 35 वर्सां परस चड काळ एका पेटींत दवरिल्ल्याचे कळटा.