भांगरभूंय | प्रतिनिधी
दिवचलः बिम्ब परिवार, दिवचल कोंकणी सेवा केंद्र आनी सांखळे कोंकणी सेवा केंद्र हांच्या सहकार्यान बिम्ब नेमाळ्याचो रुप्या महोत्सव, बिम्ब भतग्राम विशेशांक लोकार्पण सुवाळो फाल्यां आयतारा 11 तारखेर सकाळीं 9:30 वरांचेर छत्रपती शिवाजी महाराज सरकारी शाळा संकुल ऑडिटोरियम दिवचल हांगा जातलो.
मुख्यमंत्री डॉ. प्रमोद सावंत उक्तावण करतले. दिवचलचे आमदार डॉ. चंद्रकांत शेट्ये, मयेचे आमदार प्रेमेंद्र शेट, नगराध्यक्ष विजयकुमार नाटेकार आनी हेर हाजीर आसतले. दनपारां 3 वरांचेर जावपी समारोप सुवाळ्याक आदले आमदार प्रवीण झांट्ये, गोंय कोंकणी अकादमीचे अध्यक्ष डॉ. पूर्णानंद च्यारी हाजीर आसतले.
ही म्हायती दिवचले पत्रकार संघाच्या कक्षात घेतिल्ले पत्रकार परिशदेंत मानेस्तांनी दिली. ह्या वेळार दिवचल कोंकणी सेवा केंद्राचे अध्यक्ष रुपेश ठाणेकार, बिम्ब नेमाळ्याचे मुखेल संपादक दिलीप बोरकार, सांखळे कोंकणी केंद्राचे अध्यक्ष श्याम फातर्पेकार, डॉ. प्रविण सावंत, विनायक गोवेकार हाजीर आशिल्ले.
सकाळीं 9 वरांचेर भितरली पेठेंतल्या शणै गोंयबाब हांच्या घरा कडल्यान मिरवणूक भायर सरतली. 10 वरांचेर उक्तावण, मानेस्तांचो भोवमान, बिम्ब भतग्राम विशेशांकाचें लोकार्पण, वामन नायक हांचें व्याख्यान, प्रश्न मंजुषा सर्त, दनपरां 2 ते 3 कवी संमेलन आनी 3 ते 4 समारोप सुवाळो जातलो. सगल्या साहित्यीक, साहित्यमोगी, विद्यार्थ्यांनी हे कार्यावळीक हाजीर रावचें असो उलो आयोजकांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
