भांगरभूंय | प्रतिनिधी
विधिकार दिसाचे कार्यावळींत मुख्यमंत्र्यांचें आस्वासन
फुडारांत जमनी हडप जावच्यो न्हय म्हूण घेतल्या जतनाय
म्हादय प्रकरणांत आमी येसस्वी जावपाची आमकां आस्त
भांगरभूंय । प्रतिनिधी
पणजी : फाटल्या कांय वर्सांत सरकारान गोंयांत खूबशीं उदरगतीचीं कामां केल्यांत. फुडाराक लेगीत गोंयच्या लोकांच्या फायद्या खातीर कामां जातलीं. गरज पडल्यार ते खातीर गरजेचे कायदेशीर उपाय करतले, अशें आस्वासन मुख्यमंत्री डॉ. प्रमोद सावंत हांणी दिलें. शुक्रारा पर्वरे जाल्ले विधिकार दिसाचे कार्यावळींत ते उलयताले. ह्या वेळार सभापती गणेश गांवकार, विरोधी पक्ष फुडारी युरी आलेमांव, नॅशनल फॉरेंसीक युनिव्हर्सिटीचे डॉ. जे. एम. व्यास आनी हेर आदले आमदार हाजीर आशिल्ले.
मुख्यमंत्र्यान सांगलें, 2000 वर्सा उपरांत गोंयांत पर्यटन आनी हेर उद्देग वेवसाय वाडले. गोंयची उदरगत जाली, तशें कांय दुश्परिणाम लोगीत दिसूंक लागले. वाडपी उद्देगिकीकरणा वांगडा गोंयांत स्थलांतर जावपाचें प्रमाणूय वाडलें. ह्या स्थलांतरीत कामगारांक लागून कांय समस्या निर्माण जाल्यात. हाका लागून थळाव्या लोकांक त्रास जातात आमकां खबर आसा. हे बाबतींत योग्य वेळार आमी योग्य निर्णय घेतल्यात, हाचे फुडेंय घेतले.
उदरगतीच्या कामां वांगडाच वेळावेळार निर्णय घेवन सरकारान नवे बदल हाडल्यात. ‘म्हजें घर’ येवजणेचो लाव 95 टक्के थळाव्या लोकांक जातलो. पिंक फोर्स, कर्मचारी भरती आयोग, स्वयंपूर्ण गोंय, जमनी हडप प्रकरणांत एसआयटी नेमप अशें म्हत्वाचें निर्णय आमच्या कार्यकाळांत घेतल्यात. एसआयटीक लागून बनावट कागदपत्रांच्या आदारान जमनी हडप करपाचे बंद जालां. फुडाराक अशें जावचें ना हाची आमी जतनाय घेतात. म्हादय प्रकरणांत आमी येसस्वी जातले हाची आमकां खात्री आसा अशेंय मुख्यमंत्र्यांन सांगलें.
हाचे आदीं विरोधी पक्ष फुडारी युरी आलेमांव हांणी सरकाराचेर टिका केली. विधानसभा अधिवेशनांत बर्च प्रकरणाचेर चर्चा करपाक परवानगी दिवंक ना, अशें तांणी सांगलें. तांणी म्हणलें, जमनीचें रुपांतर, कॅसिनो, मेगा प्रकल्प आदी पसून गोंयांक वाटावपाक राजकी मतभेद विसरून सगळ्यांनी एकठांय येवपाचो उलो तांणी मारलो.
‘नगर नियोजन खात्याचें परिपत्रक फाटीं घेवचें’
जमीन, पर्यावरणाची राखण करप ही आमची जापसालदारकी. शेतकी जमीन गोंया भायल्यांक विकपाचेर सरकारान बंदी घालची. दोंगर कांपपाचे प्रकार वाडिल्ल्यान गोंय नश्ट जावंक लागलां. नगर नियोजन खात्याचें तें दोंगर कांपपाक परवानगी दिवपी परिपत्रक बेगोबेग फाटीं घेवचें अशें न्या. फेर्दीन रिबेलो हांणी सांगलें.
दरेका राज्यांत कॅम्पसाचो विचार : डॉ. व्यास
फाटल्या कांय वर्सांत गुन्यांव आनी गुन्यांवकारांची पद्दत बदलल्या. हे खातीर डिजिटल साक्षरता, सायबर सुरक्षा, फॉरेन्सीक विज्ञान ह्या विशयांचें गिन्यान आसप गरजेचें. केंद्र सरकारान दरेका राज्यांत राष्ट्रीय फॉरेन्सीक विद्यापीठाचें कॅम्पस स्थापन करपाचो विचार करता अशें डॉ. व्यास हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
