भांगरभूंय | प्रतिनिधी
म्हापशें : मोपाच्या मनोहर आंतरराष्ट्रीय विमानतळार 9 किलो परस चड हायड्रोपोनीक गांजो जप्त केलो. खासा गुप्तहेरांनी दिल्ले म्हायती वयल्यान गोंय कस्टम्साच्या अॅर इंटेलिजन्स युनिटान (एआययू) 7 जानेवारीक बँकॉकच्यान ताश्कंदांतल्यान येवपी एका बिलान मोहिद्दीन ह्या प्रवाशाक आडायलो आनी ताच्या बॅगेंत लिपोवन दवरिल्लो 9.036 किलो हायड्रोपोनीक गांजो (कॅनाबीज) जप्त केलो.
काळ्या बाजारांत सुमार 3.16 कोटी रुपया मोलाचो हो प्रतिबंधात्मक पदार्थ कपड्यां पोंदा लिपोवन दवरिल्लो. एनडीपीएस फिल्ड टेस्टींग किट वापरून तपासल्या उपरांत घुंवळे वखदांच्या बाबतींत हो पदार्थ पॉझिटिव्ह आयलो, उपरांत तो म्हाल जप्त केलो आनी प्रवाशाक नार्कोटिक ड्रग्स आनी सायकोट्रॉपीक सबस्टन्स (एनडीपीएस) कायदो, 1985 खाला अटक केली.
हे घडणुके वयल्यान बँकॉक – ताश्कंद – गोंय मार्गार घुंवळे वखदां विशीं तपासणी मोहीम आनीक खर करपाचे नदरेन पावलां उबारपाक सुरवात केल्या.
हो प्रवासी संघटीत सिंडिकेटाचो कुरियर म्हणून काम करतालो काय ना हें सोदून काडपा खातीर फुडली चवकशी चालू आसा अशें एका अधिकाऱ्यान सांगलें. सरकाराचे ‘नशा मुक्त भारत’ मोहिमेचो एक भाग म्हूण पाळत दवरप आनी अंमलबजावणी वाडोवपा खातीर खातें बांदील आसा, अशें कस्टम अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
