पर्राच्या नागनाथ महादेव देवळांत चोरी

भांगरभूंय | प्रतिनिधी

सुमार 35 हजार चोरले, नंदीच्या मुर्तीची मोडतोड

म्हापशेंः लिंगाभाट- पर्राच्या श्रीनागनाथ महादेव देवळाची फंडपेटी अनवळख्यांनी फोडली. सुमार 35 हजार चोरले आनी नंदीच्या मुर्तीची मोडतोड केली. देवळांतले सीसीटिव्ही कॅमेरे हालींच मोडल्यात ते नादुरुस्त आसात.
शुक्रारा सकाळीं 6.30 वरांच्या सुमाराक ही चोरी जाली. पुलिसांक 10.30 वरांचेर घडणुकेची म्हायती दिली. हे विशीं देवस्थानचे अध्यक्ष वासुदेव शिरसाट हांणी म्हापशें पुलिशेंत कागाळ दाखल केल्या.
देवळाक लागीं आशिल्ल्या भटजी मनोहर वझे हांच्या घरांक भायल्यान खिळी घालून चोरांनी चोरी केली. सदचे भशेन थळावो गोविंद सावळ सकाळीं 6.30 वरांचेर मॉर्निंग वॉक करीत देवळा लागी पावलो तेन्ना देवळाचें दार उक्तें दिसलें. तांणी लागीं वचून पळयलें तेन्ना देवळांत चोरी जाल्ल्याचें कळ्ळें.

ताणें रोखडीच देवळाच्या अध्यक्षाक हे घडणुकेची म्हायती दिली. भटजी वझे सदचे भशेन उठून फुलां हाडपाक वचपाक तयार जाले, पूण दार उगड नाशिल्ले. तांणी जनेलांतल्यान भायर पळयले तेन्ना सावळ थंयच आशिल्ले. दाराक भायल्यान खिळी आशिल्ली. भटजीन तांकां दार उगडपाक सांगलें. आनी चोरयेची म्हायती दिली.
देवळाचे अध्यक्ष आनी पदाधिकारी देवळाची पळोवणी करपाक आयले. चोरांनी देवळाच्या मुखेल दाराचेर आशिल्लें कुलूप मोडून उडयल्लें. तशेंच गर्भकुडींतल्या फंडपेटीचें दार फोडून भितरले सगळे पयशे चोरून व्हेले. तशेंच देवळांतल्या नंदीची तोडफोड केली. चोरांनी गर्भकुडीच्या दाराचेर आशिल्लें कुलूप काडपाचो यत्न केलो. पूण तांकां गर्भकुडींत भितर सरूंक मेळ्ळें ना.

हे घडणुकेची म्हायती मेळटकच म्हापशें पुलिसांनी पंचनामो केलो. तशेंच पुलीस उपअधीक्षक विल्सन डिसोझा आनी निरिक्षक नवीन देसाय हांणीय ह्या सुवातेर भेट दिवन तपासणी केली. सुण्यांचो पंगड आनी बोटांचे छाप तज्ञांचो वापर केलो.

मजगतीं देवस्थान समितीन देवळाची सुरक्षीतताये खातीर आनी वारंवार चोरी जावची न्हय हे खातीर देवळांत सीसीटीव्ही कॅमेरे लायिल्ले. पूण कांय दिसां आदीं हे कॅमेरे इबाडून सीसीटीव्ही सिस्टीम बंद जाल्ली. देखून हे चोरयेंतल्या चोरांचे तोंड सीसीटीव्हींत कैद जालें ना. ते दुरुस्त आशिल्ले जाल्यार पुलिसांक चोरांचो सोद घेवप सोंपें जाता आसलें.