मुख्यमंत्री देवदर्शन यात्रेची पयली रेल्वे मडगांव ते वालंकिणी

भांगरभूंय | प्रतिनिधी

मडगांवः मुख्यमंत्री देवदर्शन यात्रेची अंदूंची पयली रेल्वे मडगांव स्टेशनावेल्यान वालंकिणी वचपाक भायर सरली. 1200 प्रवाशांची क्षमता आशिल्ल्या हे गाडयेची योग्य प्रसिध्दी जावंक नाशिल्ल्यान अर्दे डबे रिते उरले. अचकीत नियोजनाक लागून सगळ्यो सुवाती भरप शक्य जावंक नाशिल्ल्याचें कारण मंत्री सुभाष फळदेसाय हांणी सांगलें.
फाटल्या वर्सा एका रेल्वेंतल्यान देवदर्शन यात्रे खातीर एक हजार भक्तांक व्हरूंक शकताले. पूण अंदूं 1200 प्रवाशांक व्हरपाची सोय केल्या. 9 जानेवारीक सकाळीं सुटिल्ली ही रेल्वे 10 तारखेर सकाळीं वालांकिनी पावतली. थंयच्या इगर्ज अधिकाऱ्यां कडेन चर्चा जाल्या आनी भक्तां खातीर खाशेली प्रार्थना वेवस्था केल्या. पांच ते स वरां थंय भक्त हाजीर आसतले. ते उपरांत भक्त रातच्या वेळार भायर सरून 11 तारखेर परतून गोंयांत पावतले. ह्या यात्रे खातीर जेवण, रावपाची सुवात आनी हेर सुविधांचीय वेवस्था सरकारान केल्या. हे खातीर भक्तांक एकूय रुपया खर्च करचो पडचो ना. पयले रेल्वेंत सगळ्या गोंयच्या भक्तांचो आस्पाव आसा. पूण सांताक्रूझ मतदारसंघांतले शंबरां परस चड भक्त आसात.
दरेका आमदाराक तीन दीस आदीं गाडयां विशीं म्हायती दिल्ली. हाचे भायर नोंदणी करपा खातीर खाशेली ऑनलायन सोय केल्ली. देवदर्शन यात्रेची ही पयली रेल्वे आशिल्ल्यान अचकीत नियोजनाक लागून लोकांक हे विशीं योग्य म्हायती मेळ्ळी ना. तरी लेगीत अर्द्या परस चड डबे भरल्यात अशें मंत्री फळदेसाय हांणी सांगलें.

19 तारखेर अयोध्या खातीर रेल्वे

राज्यांतल्या भक्तांनी अयोध्याक वचपाची मागणी केल्ली. ते प्रमाण अयोध्याक वचपी पयली रेल्वे अंदूं 19 जानेवारीक वतली. भक्तांच्या प्रतिसादा प्रमाण अयोध्या यात्रे खातीर आनीक डबे जोडटले. हाचे भायर ह्या वर्सा खातीर हेर खंयच्याय धर्मीक थळाची निवड अजून जावंक ना, लोकांच्या मागणी प्रमाण निर्णय घेतले अशी म्हायती समाज कल्याण मंत्री सुभाष फळदेसाय हांणी दिली.

अंदूं धा कोटी रुपयांची तरतूद

राज्य सरकारान अंदूं मुख्यमंत्री देवदर्शन यात्रे खातीर 10 कोटी रुपयांची तरतूद केल्या. हातूंतल्यान दोन कोटी फाटल्या वर्साच्या यात्रेच्या उरिल्ल्या बिलांचे दितले. जाल्यार ह्या वर्सा खातीर आठ कोटी खर्च जातले अशी म्हायती मंत्री फळदेसाय हांणी दिली.