भांगरभूंय | प्रतिनिधी
पणजीः उत्तर गोंयांत राबितो आनी वेवसायिक वाठारांत रावपी बिराडाक रावपी, पर्यटक आनी दरेकल्याची पुराय तपासणी करपाचे आदेश उत्तर गोंय जिल्होधिकाऱ्यान दिल्या.
ह्या आदेशा प्रमाण, घरां, इमारती, फ्लॅट्स, हॉटेल्स, लॉज, शॅक्स, खाजगी गेस्ट हावसेस, पेइंग-गेस्ट सुविधा आनी धर्मीक संस्था आदी सुवातींनी धनयांनी खंयच्याय मनशाक रावपाक दिवचे पयलीं ताची वळख तपासप गरजेचें आसा. ते खातीर वेंचणूक आयडी कार्ड, वाहन चालक परवानो, आधार कार्ड वा पासपोर्ट अशा वैध वळखपत्राचो वापर करून त्या व्यक्तीचो तपशील तपासप गरजेचें. तशेंच खंयच्याय मनशाक उत्तर गोंयांत रावपाक परवानगी दिवचे पयलीं धनयांनी भाडेकरु, भेटीदार आनी सोयऱ्यांचो सत्यापन अर्ज भरप गरजेचें. उपरांत तो अर्ज फुडल्या तपासणे खातीर आनी नोंदणी खातीर थळाव्या पुलीस स्टेशनांत दिवचो.
मजगतीं, आंतरराश्ट्रीय पर्यटन राज्य आशिल्ल्या गोंयांत देश-विदेशांतल्यान जायते लोक येतात. कांय वेळ तर खांपे गुन्यांवकार लेगीत पर्यटक जावन गोंयांत रावतात. उपरांत घरफोडी, लुटमार वा खून सारके गुन्यांव करतात आनी पळून वतात. मागीर तांची फावो ती वळख दवरुंक नाशिल्ल्यान तांचो सोद घेवप पुलिसांक कठीण जाता. गोंयांत रावपी लोकांची वळख जावची हे खातीर वयले निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
