भांगरभूंय | प्रतिनिधी
ही किचकट सरकारी प्रक्रियाय सोंपी करप गरजेचें. कारण भ्रश्टाचाराचें हें उगमस्थान.
जल्माक येवन पंढरपूर पळयात अशें संत सेना न्हावी म्हणटात. विठ्ठलाचें दर्शन घेवपाचें आनी चंद्रभागेंत न्हांवपाचें म्हत्व ते अभंगांत सांगतात. पांडुरंगाच्या खऱ्या भक्ताक पंढरपूराक पावप म्हणल्यार जल्माचें कल्याण जालें, अशेंच दिसता. हेच धर्तेर, नोकरी इत्सुक तरणाट्याक सरकारी नोकरी मेळप म्हणल्यार जल्माक आयिल्ल्याचें सार्थक जालें, अशें दिसले बगर रावना. ती नोकरी मेळोवपाक कसलीय तपश्चर्या करपाची ताची तयारी आसता. पयलीं वशिलो लावचो पडटालो, मात आतां ताची गरज ना, अशें सरकारान जाहीर केलां. 95 जाणांची बांदकाम खात्यांत भरती केल्या. काल नेमणूक पत्रां भेटयलीं. त्या वेळार मुख्यमंत्री, बांदकाम मंत्र्यान तांकां मोलादीक संदेश दिलो, तो सगल्याच सरकारी नोकरदारांनी पाळपाक जाय.
कर्मचाऱ्यांनी खंयच्याच हांयसाक बळी पडचें न्हय. बदली करपाक आमदारांच्यो शिफारशी घेवन येवचें न्हय. नोकरी दिवपाक पयशे मागल्यात, अशें एजंट सांगता, ताका बळी पडचें न्हय, असो उलो मुख्यमंत्र्यान मारला. नाजाल्यार बडतर्फ, निलंबीत करपाक फाटीं फुडें पळोवचें नात. विसां वयर कर्मचाऱ्यांक बडतर्फ केल्यात, अशेंय तांणी स्पश्ट केलें. पयलीं अर्जांचेर अर्ज, परिक्षा दिवच्यो पडटाल्यो. आतां कर्मचारी भरती आयोगा वतीन पारदर्शक पद्दतीन, गुणवत्तेचेरुच आदारीत नोकऱ्यो दिल्यात, अशें तांणी सांगलें. सरकारान नोकर भरती पद्दतीक कायद्याची फास्की घालपाक जाय. म्हणटकच भलायकी, वीज, येरादारी अश्या साबार खात्यांनी सगल्या तालुक्यांतल्या गुणेस्त उमेदवारांक नोकरी मेळटली. बरें प्रशासन आनी पादर्शकताय ही काळाची गरज. काल नोकरी मेळिल्ल्या अभियंत्यांनी वेळार काम करपाची गरज आसा. बांदकाम खात्याचो प्रधान मुख्य अभियंतो जावपाची मोख प्रत्येकान दवरची. कारण आयज निवृत्त जावनूय तीन- तीन फावटीं अधिकाऱ्यांक सेवावाड दिवची पडटा. बरेच सरकारी नोकर लागींच बदली सोदतात. खंयच्याच कर्मचाऱ्याची तालुक्या भायर बदली जायना, पूण आमदाराचो वशिलो घेवन आयल्यार पयस बदली करतले, अशी शिटकावणी मुख्यमंत्र्यान दिली, हेंय बरें केलें. सुडबुद्धीन पयसुल्ल्या तालुक्यांत बदली करतात, थोडे एकाच कार्यालयांत वर्साचीं वर्सां काम करतात अशेंय म्हणटात, तें फट थारोवपाचे नदरेन आतां पावलां उखलूंक फावो.
वशिलो, हप्ते, टक्केवारी घेवप्यांचेर खर कारवाय करपाची शिटकावणीय सरकारान काल दिल्या. आनीकूय कांय पावलां उबारपाचो वेळ आयला. गर्दी आसता, त्या कचेऱ्यांनी एजंट नेमिल्ले आसतात. ते भायर बसून अर्ज बी बरोवन दितात. गरजेचीं सगलीं कागदां कार्यालया बदला स्टेशनरी दुकानांनी मेळटात. दाखल्याचेर फक्त एक सही घेवपाक तीन वरां बसचें पडटा. मरण आयिल्ल्या व्यक्तींच्या वारसदारांक बँकेंतले पांच- धा लाख मेळोवपाक नोटरी, मामलेदार, हो दाखलो, तो दाखलो हाडपाक उण्योच 10-12 फावटी मारच्यो पडटात. ही किचकट सरकारी प्रक्रियाय सोंपी करप गरजेचें. कारण भ्रश्टाचाराचें हें उगमस्थान. सरकारी नोकरदारांनी वेळार येवप, वेळार घरा वचप बंधनकारक. वेळो पाळिनाशिल्ल्यांचेर, दांडी मारप्यांचेर खर कारवाय जाय. फक्त कचेरेंत बसपीच न्हय, तर अत्यावश्यक सेवेंतल्या भायल्या कामगारांचोय हातूंत आसपाव करपाक जाय. सोरो पियेवन येवप्यांचेर कारवाय करपाची एक येवजण फाटीं किलल्ली. पूण ती रोखडीच बावली. गरिबां कडल्यान कामाचे पयशे घेवचे न्हय, असो उलो बांदकाम मंत्र्यान मारला. गरिबूच कित्याक गिरेस्त, देशी, विदेशी कंपनीं कडल्यान पसून पयसो घेवपाक जायना. सगलेंच पारदर्शक आसचें.
सरकारी नोकरदारां विशीं लोकांच्यो कागाळी आसतात. त्यो करपा खातीर आॅनलायन सुविधा सुरू करूं येता. त्यो कागाळी दरेका विभागाच्या मुखेल्यान, संबंदीत मंत्र्यान आयकपाक जाय. तथ्य आसल्यार कारवाय करूंक जाय. सरकारी अधिकारी मंत्र्यांचें पसून आयकनात, असो शीण हालींच पर्यटनमंत्र्यान काडला. म्हणटकच सामान्य मनशाचें कितें हाची फक्त कल्पना करची. सरकारी नोकरदारांनी हें सगलें आयकलां मूं?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
