विधीकारांनी तालुको पावंड्यार एकठांय येवचें

भांगरभूंय | प्रतिनिधी

विधानसभेक मार्गदर्शक म्हणून बांदिल्लो विधीकारांचो मंच कायद्यान व्हड करपाचेर उपरांतच्या दिसांनी भासाभास घडोवन हाडूंक येता.

मतदारांनी वेंचून हाडिल्ल्या लोकप्रतिनिधींचें एकठांय जावन राज्य, संघ प्रदेसा खातीर कायदे करपाचें थळ म्हणल्यार विधानसभा. गोंय मुक्ती उपरांत पयली विधानसभा जाली तो दीस 9 जानेवारी. विधीकार दिसाची कार्यावळ ह्या दिसा सादेपणान गोंयचे कालचे, आतांचे आमदार, खासदार एकठांय जावन मनयतात.
गोंयांक राज्य पावंडो फावो जातना लोकप्रतिनिधी वाडले. राजपाटण पणजेतल्या आदिलशहाच्या पालासींतल्यान पर्वरे विधानसभेचें थळांतर करपाची येवजण जाली. पर्वरे- बार्देस तालुक्यांतलो एक मतदारसंघ. विधानसभा प्रकल्प बांदल्या उपरांत मंत्रालय, सचिवालयाची बांदावळ पर्वरे जाली. आयज बरींच सरकारी कार्यालयां त्याच वाठारांत पावल्यांत. उदरगतींत मुखार सरतना पर्वरी, गोंयांत नवीं आडमेळीं येतात. तांचेर भासाभास अंदुच्या विधिकार दिसा निमतान जावची अशें लोकांक दिसतलें. लोकप्रतिनिधींक ताची जाणवीकाय आसली तरी लोकप्रतिनिधींचे मुळावे प्रस्नय ते दिसा मांडटात. लोकप्रतिनिधीं खातीर हाॅस्टेल गोंयांत अजून जावंक ना. एका तेंपार आदले आमदार बाबुसो गांवकार हांचे वरी लोकप्रतिनिधी लोकप्रतिनिधींचे प्रस्नय तळमळीन मांडटाले. कुळ मुंडकार, भूंये वयलीं आक्रमणां, अतिक्रमणां, येवपी अरिश्टां, पुर्तुगीज तेंपा वयल्या कायद्यांचेर उजवाड घालपी भासाभासय विधिकार दिसा जाताली. कालचे आमदार शिस्तीन बोवाळ घालपाची संद घेताले. तातूंतल्यान नवे कायदे जाल्यात, चालीक लायतना नवीं आडमेळींय तयार जातात. तीं पयस करपाची, अचूक म्हायती, येवजण दिवपी आदले खासदार अमृत कांसार हांचे वरी लोकप्रतिनिधी कितले आसात? दोगय त्रासांतल्यान शिक्षण घेवन आदवोगाद जाल्ले.
उदरगतींतल्यान फुडें सरपी गोंय हेर राज्यां वांगडा सर्तींत साधनसुविधांत उणे पडूंक ना. पांच- सात वर्साआदीं बांदावळ जाल्ल्या साधनसुविधांतलीं उणेपणा आयज दिसून येतात. राजपाटण पणजी स्मार्ट जातना वीस- बावीस वर्सां आदीं बांदिल्ल्यो सुविधा मोडपाचे वाटेर आसात. मडगाव, मुरगांव म्हापालिका करपाची येवजण जावपाक जाय. कालच्या लोकप्रतिनिधींक तालुक्याचे सुवातेर एकठांय हाडून आदल्या आमदारांच्या मंडळान भासाभासेक आरंभ करपाची गरज उपरासल्या. विधीकार दिसाची, विधीकारांची माची उत्तर, दक्षीण गोंयच्या पावंड्यार बांदपाचे, व्हरपाचे गरजे विशीं सरकारय विचार करुंक शकता. नव्या आमदारांक भासेची, विधिमंडळाची, गोंयची संस्कृताय, कायद्यांच्या तजविजां विशीं शिक्षण दिवंक जाय. पयलींचे आमदार स्कुटरींनी, ल्हान गाडयो, चलत भोंवताले. आयज रस्ते रुंद जाल्यात, गाडयो लक्झरी, सुपर लक्झरी जाल्यात.
पयल्या मुख्यमंत्र्यांनी मुळाव्या सरकारी शाळा सुरु केल्यो, मनीसबळ हेर राज्यांतल्यान आयलें, थळांतराचें तें पयलें पावल. उंचेल्या पावंड्या वयलें शिक्षण, शिक्षणीक मळार हेर सुविधा पेडणे, सत्तरी ते केपें – काणकोणा मेरेन पावोवपाक उपरांतच्या मुख्यमंत्र्यांनी व्हड वावर केला. मुळावें ते बारावी मेरेनचें शिक्षण एकेच संस्थेत मेळचें हे खातीर फाटल्या वीस वर्सांनी साधनसुविधांक सरकारान आधार दिलो. मुळाव्या शाळा, हाॅस्पिटलां पासत बांदिल्ल्यो सुविधा पडून आसत जाल्यार त्यो सरकारान घेवन कुशावती जिल्हो कार्यालय सुरु करुंक येता. विधिकारांनी सुचोवण्यो करुन आपलें म्हणणे सरकाराक कळयल्यार कुशावतीच्या सुविधांची बेगीन बांदावळ जातली. जिल्ह्यांच्या अधिकारांचेर विधानसभेंतल्या प्रतिनिधींनी विचार परगटावपाक जाय. नवे कायदे करतना, आदले सुदारतना त्या विचारांक आसपावन घेवंक येता.
आमदारांनी एकचित्त जावन विधानसभेंत आपल्या मतदारसंघांतल्या सुविधां विशी मागण्यो केल्यार त्यो सरकार मानून घेवंक शकता. आदल्या आमदारांच्या मंचान बऱ्योच मागण्यो पुराय करुन घेतल्यो, ताचो लाव फुडारांतल्या लोकप्रतिनिधींक मेळटा.
कसिनो मांडवी न्हंयेंतल्यान भायर काडपाकच जाय. मुळावो कायदो ते भायर दर्यांत दवरपाक सांगता. कसिनोच्यो कचेऱ्यो पणजेंतल्यो पासयो आडायतात, पणजे भायर त्यो व्हरच्यो. येणावळमंत्री आतानासियो (बाबुश) मोन्सेरात तशें उतर पणजेंतल्या मतदारांक दिल्लें तें पाळपाचो वगत आयला. कसिनो हाडपी आयज सरकारांत नासले तरी जापसालदारकी सोंपूंक ना. कसिनो हें मटको, जुगाराचें व्हड रुप, कांय देस त्या अर्थकारणांतल्यान लुकसाणेंत गेल्यात. सरकारान कसिनोंतल्यान मेळपी येणावळ, समाजजीणेचेर जाल्ल्या परिणामा विशीं अभ्यास करुंक जाय.
गोंया भायले आय ए एस, आय पी एस अधिकारी, राखणे मंत्रालयाचे कर्मचारी गोंयांत काॅलनी सेवा सोंपल्या उपरांतय बांदून रावतात. गोंयकार तातूंत कितले आसात त्या विशयाचो नियाळ जावचो. मोपा लागसार भूंय विकती घेतिल्ले आदले, आतांचे मंत्री, आमदार आसतले. त्या जमनींचे मोल आयज वज्रामोलांचें आसतलें. गोंयां भायर रावपी गोंयकारांक भूंय घेवपाक कित्याक आडावप? शेतजमीन विकप थांबोवपाक कायदो जितलो गरजेचो तितलोच तो बेगीन चालीक लागपय. आदल्या आमदारांच्या तालुको माचयेर तालुको, मतदारसंघांतले उदरगतीं विशीं भासाभासेचो हो विशय आसा.
हडफड्यांच्या क्लबाच्या उज्यांतल्यान प्रशासकी घाळपणा मुखार आयल्यांत. लयराईची जात्रा परतून जातली ते आदीं खेटाखेट परतून जावची न्हय म्हणून नेमावळ कशी करुंक येता ते आदले आमदार सांगत व्हय? आदल्या आमदारांच्या तालुको माचयेक आतांच्या आमदारांनी तेंको दिवन तांचे बरोबर बसून लोकांच्यो कागाळी आयकुपाक जाय. संयम, सोंशिकपण आमदारांक आसपाक जाय. सत्तेंत आशिल्ल्या, विरोधी आमदारांनी कालच्या आनी आतांच्या आमदारांनी एकामेकां कडेन उलोवप, आयकून घेतल्यार कितल्योशोच अडचणी पयस जावंक येतात. गरजेक बोवाळ घालपाची, थांबपाची, थांबोवपाची तांक आमदारांक आसपाक जाय. लागसल्ल्या मतदारसंघांत वचून लोकांक समजून घेतल्यार, लोकां मेरेन येवजणी पावयल्यार अदमासपत्रकांत केल्ल्या पयशांचो बरे भशेन विलो लागतलो.
उदरगतींतल्यान लोकप्रतिनिधीच न्हय समेस्तय गिरेस्त जाल्यात, तांकांय राजकारणांत येवपाच्यो चावयो खंय आसात तें कळटा. राजकारणी 24 वरां मतदारसंघा खातीर, मतदारां पासत आसचो अशें दिसपी मतदार आसतले तेन्ना तातूंत आपसुवार्था वांगडा दुसऱ्यांचो विचार करपी कितलो आसात?
सत्तेंत आसतना आदल्या राजकी पक्षांनी जें वायट केलें तें अकस्मात आडावपाक, थांबोवपाकय कळाव लागता. कार्यकर्त्यांचो एक पंगड झुजत आसता तातूंत तांचो सुवार्थ काय ना? विधीकारांनी कालच्या, आतांच्या राजकारणाचो, राजकी बदलांचो नियाळ करपाक जाय. एक विधीकार दीस ते खातीर पावता? विधीकार मंचान आतांच्या आमदारांकय आसपावन नवे वाटेन वचप शक्य आसा. विधानसभेक मार्गदर्शक म्हणून बांदिल्लो विधीकारांचो मंच कायद्यान व्हड करपाचेर उपरांतच्या दिसांनी भासाभास घडोवन हाडूंक येता. सरकाराक नवे कायदे करपाक तातूंतल्यान मजत जातली. मंत्री, आमदारांनी विधीकार दीसाचे कार्यावळींत चार -पांच वरां हाजीर रावल्यार ज्येश्ठांक बरें दिसतलें. ज्येश्ठ लोकप्रतिनिधींक तालुको पावंड्या वयली माची भलायकेच्या नदरेंतल्यान बरी. उमाळ्यांक नवी दिका दिवपी.

सुहासिनी प्रभुगांवकार
9881099260