भांगरभूंय | प्रतिनिधी
मुख्यमंत्री प्रमोद सावंत हांची नव्या कर्मचाऱ्यांक शिटकावणी
आमदारांचो फावोर हाडल्यार पयसुल्ले सुवातेर बदली
पदांची भरती 100 टक्के पारर्दशक, मॅरिटाचेरूच नोकरी
भांगरभूंय । प्रतिनिधी
पणजी : बरें प्रशासन आनी पारदर्शकता ही काळाची गरज आसा. देखून खंयच्याच हांयसाक बळी पडचे न्हय. निलंबन वा बडतर्फ करपाक सरकार फाटीं फुडें पळोवचें ना. उपरांत जर बदली करपा खातीर आमदारांची शिफारसी घेवन आयल्यार पयशिल्ल्या सुवातांनी बदली जातली, अशी शिटकावणी मुख्यमंत्री डॉ प्रमोद सावंत हांणी नव्यान भरती केल्ल्या भौशीक बांदकाम खात्याच्या कर्मचाऱ्यांक दिल्या.
कर्मचारी भरती आयोगा वरवीं भौशीक बांदकाम खात्यात निवड जाल्ले 95 कनिश्ठ अभियंते आनी तांत्रिकी अधिकाऱ्यांक नियुक्ती पत्रांचें वांटप मुख्यमंत्री डॉ. प्रमोद सावंत हांचे हस्तुकीं पर्वरे मंत्रालयांत केलें. ह्या नव्यान भरती केल्ल्या कर्मचाऱ्यांक संबोधीत करतना मुख्यमंत्री डॉ. प्रमोद सावंत उलयताले. ह्या वेळार भौशीक बांदकाम मंत्री दिगंबर कामत, मुखेल सचीव व्ही. कांदावेलू, भौशीक बांदकाम खात्याचे प्रधान मुखेल अभियंते उत्तम पार्सेकार आनी हेर अधिकारी हजर आशिल्ले.
हुशार, पात्र भुरग्यांची कर्मचारी भरती आयोगाचे पार्दशक प्रक्रियेंतल्यान भरती केल्या, अशें मुख्यमंत्र्यान सांगलें.
पयलीं 25 खेपे अर्ज करचे पडटाले, परिक्षा दिवची पडटाली आनी निकालाची वाट पळोवची पडाटली. तशेंच निकाला उपरांत खूब जाणांच्यो कागाळी लेगीत येताल्यो. आतां एकेच खेपेन ग्रामीण उदरगत खातें, भौशीक बांदकाम खातें आनी वीज खात्यांत सीबीटी परिक्षा घेवन एकाच वेळार पदांची भरती 100 टक्के पारर्दशक पद्दतीन जाता. देखून तुमची निवड कितले पार्दशक पद्दतीन जाल्या हे उरिल्ल्या भुरग्यांक सांगपाची गरज आसा. जे कोण ‘चिंदी चोर’ येवन सांगतात तुमचें काम करता म्हूण तांकां फुड्यांत उबे करूं नाकात. फक्त मॅरिटाच्या आदाराचेरूच नोकरी मेळटा हो स्पश्ट संदेश वचपाक जाय, अशें मुख्यमंत्र्यान सांगलें.
फुडलीं 30 वर्सां तुमी प्रशासनांत सेवा दितले. तुमच्यांतलो कोण एकलो फुडाराक प्रधान मुखेल अभियंतो म्हूण काम करतलो. देखून बरें प्रशासन आनी पारर्दशकता ही काळाची गरज आसा. हांयसांक बळी पडनासतना आपलो सीआर तुमी व्हगडावन घेवचो न्हय. निलंबन करपाक वा बडतर्फ करपाक आमी फाटीं फुडें विचार करचे नात. म्हज्या काळांत 20-25 जाण निलंबीत जाल्यात, अशी समज मुख्यमंत्र्यान दिली.
गरिबां कडल्यान ‘चिरिमिरी’ घेवं नाकात : दिगंबर कामत
कसलोच फावर नासतना मेरीटाचे आदाराचेर गरीब भुरग्याक नोकरी दिल्या असो स्पश्ट संदेश मुख्यमंत्री डॉ. प्रमोद सावंत हांणी दिला. देखून गरीब लोक आसात तांचे कडेन संवेदनशील रावून तांकां तुमी मजत करची. लक्षांत दवरात, तुमची निवड ही मॅरिटाचेर जाल्या. तुमी नोकरे खातीर कसलीच ‘चिरिमिरी’ दिवंक ना, ते खातीर गरीब जनतेक लेगीत ‘चिरिमिरी’ पडपाक जायना, अशें भौशीक बांदकाम मंत्री दिगंबर कामत हांणी सांगलें.
हक्काचो दुरुपेग करचो न्हय : डॉ. सावंत
कोणाकूच पेडणेंच्यान काडून काणकोणां घालूंक ना. सगल्यांची तांच्या म्हाला भितरूच निवड जाल्या. आपल्या घरा कडेन बदली मागू नाकात. बदली दुसरी कडेन करची अशे फावोर आमदारां कडेन घेवन आयल्यार बदली पयस जातली. आपल्या हक्काचो दुरुपेग करूं नाकात. तुमच्या पालकांक तुमच्या चुकींची माफी मागपा खातीर येवपाक लावं नाकात, असोय सल्लो मुख्यमंत्र्यान दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
