भांगरभूंय | प्रतिनिधी
तीन लोकायुक्तां मदल्या दोन लोकायुक्तांनी पुराय केलो कार्यकाळ
पणजी : मुंबय उच्च न्यायालयाचे निवृत्त न्यायाधीश संदीप शिंदे हे गोंयचे चवथे लोकायुक्त आसतले. आतां मेरेनच्या तीन लोकायुक्तां मदल्या दोन लोकायुक्तांनी निर्धारीत कार्यकाळ पुराय केला. पयले लोकायुक्त बी. सुदर्शन रेड्डी हांणी स म्हयन्यां उपरांत लोकायुक्तपदाचो राजिनामो दिल्लो. ५ ऑक्टोबर २०११ ह्या दिसा गोंय लोकायुक्त विधेयक विधानसभेंत संमत जालें. उपरांत १२ मे २०१२ ह्या दिसा राष्ट्रपतींचे मान्यते उपरांत कायदो अस्तित्वांत आयलो. १ मार्च २०१३ सावन लोकायुक्त कायद्याची कार्यवाय राज्यांत सुरू जाली. सर्वोच्च न्यायालयाचे निवृत्त न्यायाधीश बी. सुदर्शन रेड्डी हांणी लोकायुक्तपदाचो सोपूत घेतले उपरांत ३ एप्रील २०१३ सावन प्रत्यक्ष कामकाजाक सुरवात जाली. स म्हयन्यां उपरांत १९ ऑक्टोबर २०१३ दिसा रेड्डी हांणी पदाचो राजिनामो दिलो. उपरांत अडेज वर्सां लोकायुक्तपद रितें आशिल्लें. फाटल्या वर्सा बी. सुदर्शन रेड्डी हांणी इंडिया ब्लॉक वतीन उपराष्ट्रपदीपदाची वेंचणूक लढयल्ली.
उपरांत पाटणा उच्च न्यायालयाचे निवृत्त न्यायाधीश पी. के. मिश्रा हांणी २८ एप्रील २०१६ तारखेर लोकायुक्तपदाचो सोपूत घेतलो. गोंयचे ते दुसरे लोकायुक्त जाले. १७ सप्टेंबर २०२० ते ह्या पदाचेर आशिल्ले. मिश्रा हांचो कार्यकाळ सोंपल्या उपरांत ७ म्हयने लोकायुक्तपद रितें आशिल्लें. उपरांत मुंबय उच्च न्यायालयाचे निवृत्त न्यायाधीश अंबादास जोशी हांणी ७ मे २०२१ दिसा लोकायुक्तपदाचो सोपूत घेतलो. २० डिसेंबर २०२४क तांचो कार्यकाळ सोंपलो. २० डिसेंबर २०२४ उपरांतच्यान हें पद रितें आसा.
निवृत्त न्यायाधीश संदीप शिंदे हांचें नांव निश्चीत जरी जालां तरी उच्च न्यायालयाच्या मान्यताये उपरांत नेमां प्रमाण तें राज्यपालांक धाडटले. हाका लागून आनीक म्हयनोभर तरी लोकायुक्त पद रितें आसतलें, अशी म्हायती सुत्रांनी दिली.
एका लोकायुक्ताचो कार्यकाळ पुराय जाले उपरांत हें पद बरेंच दीस जाले रितें उरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
