भांगरभूंय | प्रतिनिधी
मुख्यमंत्री प्रमोद सावंत हांची नव्या कर्मचार्यांक शिटकावणी
पणजीः बरें प्रशासन आनी पारदर्शकताय ही काळाची गरज. देखून खंयच्याय हांयसाक बळी पडचे न्हय. सरकार निलंबन वा बडतर्फ करपाक फाटीं फुडें विचार करचेंना. उपरांत जर बदली करपा खातीर आमदारांच्यो शिफारसी घेवन आयल्यार पयसुल्ल्या सुवातांचेर बदली जातली, अशी शिटकावणी मुख्यमंत्री डॉ. प्रमोद सावंत हांणी नव्यान भरती केल्ल्या भौशीक बांदकाम खात्याच्या कर्मचार्यांक दिल्या.
कर्मचारी भरती आयोगा वरवीं बांदकाम खात्यांत निवड जाल्ले ९५ कनीश्ठ अभियंते आनी तांत्रीकी अधिकार्यांक नियुक्ती पत्रांचें वांटप डॉ. सावंत हांचे हस्तुकीं पर्वरे मंत्रालयांत जालें. ह्या नव्यान भरती केल्ल्या कर्मचार्यांक संबोदीत करतना मुख्यमंत्री उलयताले. ह्या वेळार बांदकाम मंत्री दिगंबर कामत, मुखेल सचीव व्ही. कांदावेलू, बांदकाम खात्याचे प्रधान मुखेल अभियंते उत्तम पार्सेकार आनी हेर अधिकारी हाजीर आशिल्ले.
हुशार पात्र भुरग्यांची कर्मचारी भरती आयोगाचे पार्दशक प्रक्रीयेंतल्यान भरती केल्या, अशें मुख्यमंत्र्यान सांगलें. पयलीं २५ खेपे अर्ज करचे पडटाले, परिक्षा दिवची पडटाली आनी निकालाची वाट पळोवची पडाटली. तशेंच निकाला उपरांत खूब जाणांच्यो कागाळी लेगीत येताल्यो. आतां एके खेपे ग्रामीण उदरगत खातें, भौशीक बांदकाम खातें आनी वीज खात्यांत सीबीटी परिक्षा घेवन एकाच वेळार पदांची भरती १०० टक्के पारदर्शक पध्दतीन जाता, अशें मुख्यमंत्र्यान सांगलें.
देखून तुमची निवड कितले पारदर्शक पद्धतीन जाल्या हें उरिल्ल्या भुरग्यांक सांगपाची गरज आसा. जे कोण चिंदी चोर येवन सांगतात तुमचें काम करता म्हूण, तांकां धांवडायात. फकत मेरीटाच्या आधाराचेरूच सर्विस मेळटा हो स्पश्ट संदेश वचपाक जाय, असो उलो मुख्यमंत्र्यान मारलो.
फुडलीं ३० वर्सां तुमी प्रशासनांत सेवा दितले. तुमच्यांतलो कोण एकलो फुडाराक प्रधान मुखेल अभियंतो म्हण काम करतलो. देखून बरें प्रशासन आनी पारर्दशकताय ही काळाची गरजा आसा. हांयसांक बळी पडनासतना आपलो सीआर तुमी व्हगडावन घेवचो न्हय. निलंबन करपाक वा बडतर्फ करपाक आमी फाटी फुडें विचार करचे ना. म्हज्या काळांत २०-२५ जाण निलंबीत जाल्यात, अशें मुख्यमंत्र्यान सांगलें.
कोणाकच पेडण्यांतल्यान काडून काणकोणा घालूंक ना. सगल्यांची तांच्या तालुक्या भितरच निवड जाल्या. आपल्या घरा कडेन बदली मागूं नाकात. बदली दुसरे कडेन करची असो फावर आमदारां कडेन घेवन आयल्यार बदली पयस जातली. आपल्या हक्काचो दुरुपेग करूं नाकात. तुमच्या पालकांक तुमच्या चुकींची माफी मागपा खातीर येवपाक लावं नाकात, असोय सल्लो मुख्यमंत्र्यान दिलो.
कसलोच फावर नासतना मेरीटाच्या आदाराचेर गरीब भुरग्यांक नोकरी दिल्या असो स्पश्ट संदेश मुख्यमंत्री डॉ. सावंत हांणी दिला. देखून गरीब लोक आसात तांचे कडेन संवेदनशील रावून तांकां तुमी मजत करची. लक्षांत दवरात तुमची निवड ही मेरीटाचेर जाल्या. जशें तुमी नोकरे खातीर कांयच हांयस दिवंक ना तशेंच गरीब जनतेक दिवपाची पाळी येवपाक जायना, असो उलो बांदकाम मंत्री दिगंबर कामत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
