भांगरभूंय | प्रतिनिधी
राज्य वेंचणूक आयोगाची खासदार विरियातो हांकां नोटीस
मडगांव : एसआयआर खाला नागरिकांक वळख सिद्ध करपा खातीर कागदपत्रां सयत हाजीर रावपाच्यो नोटीसो धाडटात. अशीच नोटीस दक्षीण गोंय खासदार कॅ. विरियातो फर्नांडीस हांकाय आयल्या. वैध मतदारांचीं नांवां काडपा खातीर हो उपक्रम आशिल्ल्याचे चिंतेक हो पुश्टी दिवपी प्रकार आशिल्ल्याचें मत खासदार फर्नांडीस हांणी उक्तायलें.
राज्य वेंचणूक आयोगा कडल्यान मतदार वळेरेंत नांव कायम दवरपा खातीर वळख सिद्ध करपी कागदपत्रां सयत हाजीर रावपा विशीं खासदार कॅ. फर्नांडीस हांकां नोटीस धाडल्या. राज्य वेंचणूक आयोगान २०२४ चे लोकसभा वेंचणुके मजगतीं, दरेका उमेदवाराचें नांव मंजूर करचे पयलीं सगल्या कागदपत्रांचें व्हॅरिफिकेशन करीत प्रतिज्ञापत्रूय घेतलां. हाचे उपरांतूय लोकसभा वेंचणुको दोन वर्सां आदीं लढिल्ल्या आनी सध्याच्या खासदारांक वेंचणूक आयोगा कडल्यान कागदपत्रांचें व्हॅरिफिकेशन आनी वळख धाडपा खातीर नोटीस दिल्ल्यान सोशल मिडिया वरवीं विवीध प्रतिक्रिया येवपाक लागल्यात. तशेंच हें सगलें विरोधी पक्षांच्या फुडार्यांक, कार्यकर्त्यांक आनी सरकार विरोधांतल्या मनशांचो लोकशायेन दिल्ल्या हक्कांचेर वेर हाडपाचो यत्न केल्ल्याचो आरोप परत जावपाक लागला.
हाचेर खासदार कॅ. फर्नांडीस हांणी सांगलें, सर्गेस्त प्रधानमंत्री राजीव गांधी हांच्या १८ वर्सांच्या तरणाट्यांक मतदानाचो हक्क दिवपाच्या फुडाकारा खातीर पात्र जाले उपरांत १९८९ सावन मतदान करतां. भारतीय नौदळांतल्या २६ वर्साचे सेवे मजगतीं, लोकसभा, विधानसभा, पंचायत वा जिल्लो परिशद वेंचणुकां मदीं मतदान करपा खातीर लश्करी नियुक्तीच्या पयसुल्ल्या सुवातां वेल्यान गोंयांत खुबशे फावटीं प्रवास केला. मतदार पुनरीक्षण कार्यावळींत एका खासदाराक अशे तरेन कागदपत्रांच्या छाननीक मुखार वच्चें पडटा, जाल्यार सामान्य मनशाची अवस्था कितें आसतली, हाची कल्पनाच केल्ली बरी, अशेंय खासदार फर्नांडीस हांणी म्हणलें.
विरोधी पक्ष आनी स्वयंसेवी संस्था, नागरिकांनी वेंचणूक आयोगा वरवीं वैध मतदारांची नांवां काडपा खातीर आनी तांकां मतदानाचे लोकशाय प्रक्रियेत भाग घेवपा पसून आडावपा खातीर एसआयआर प्रक्रिया राबयल्ले खातीर चिंता उक्तायिल्ली. त्या दुबावाची पुश्टी करपी हो प्रकार, अशें फर्नांडिस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
