भांगरभूंय | प्रतिनिधी
मडगाव : कोंकण रेल्वेचें मडगाव रेल्वे स्टेशन हें मुखेल जंक्शन. ह्या रेल्वेस्टेशनाचेर गाडयांची तांक २०३० मेरेन दुपेटीन वाडोवपाचो प्रस्ताव आसा. ते प्रमाण येवपी कांय वर्सांनी मुळाव्यो सुविधा उबारप, कोचिंग टर्मिनल्स आनी प्रवाशां खातीर सुविधा उबारपाचीं कामां टप्प्याटप्प्यान करतात, अशी म्हायती कोंकण रेल्वे प्रशासना वतीन दिली.
प्रवाशांचे मागणेंतली बेगोबेग आनी सेगीत वाड लक्षांत घेवन, फुडल्या ५ वर्सांनीं मुखेल शारांतल्यान नव्यो गाडयो सुरू करपाची तांक सध्याचे पातळे परस दुपेटीन करप गरजेचें. येवपी वर्सांची गरज पुराय करपा खातीर सध्याच्या मुळाव्या सुविधां मदीं वाड करप गरजेचें आशिल्ल्याचें भारतीय रेल्वेन सांगलां. हे फाटभूंयेर मडगांव रेल्वेस्टेशनाचेरूय सुविधां सयत रेल्वेच्या आंकड्यांतूय वाड जातली.
मडगांव रेल्वे स्टेशनाचेर प्रवाशांची वेवस्था सुदारपा खातीर आनी तांकां आनी सुविधा दिवपा खातीर खुबशीं कामां हातांत घेतल्यांत. हालींच पुराय जाल्ल्या कामां मदीं रेल आर्केड, प्लॅटफॉर्माचेर प्रवाशांच्या येरादारी खातीर बॅटरीचेर चलपी गाडयो आनी लिफ्ट आनी रॅम्प सयत सगल्या प्लॅटफॉर्माक जोडपी नवो चलत वचपाचो पूल हांचो आसपाव आसा. ह्या नव्या पुलाच्या बांधकामाचो खर्च १५ कोटी रुपया आशिल्लो. २४ कोचच्या एलएचबी रेक खातीर प्लॅटफॉर्मचो विस्तार आनी हाताळणीची तांक सुदारपा खातीर आनी शटिंगचो वेळ उणो करपाक नव्या स्टेबलिंग लायनीचेंय काम पुराय जालां. ‘वंदे भारत’ गाडयां खातीर तपासणी सुविधायोय सुरू केल्यात. हेर कामां जीं बेगीनूचच सुरू करयलीं तातूंत ट्रान्झिट लावंज आनी मडगांव स्टेशनांचेर २४ कोचच्या एलएचबी रेक खातीर पिट लायनचो विस्तार हाचो आसपाव आसा.
वाडपी तांकीची गरज पुराय करपा खातीर, मडगांव स्टेशना खातीर एका नव्या पुराय लांबायेच्या प्लॅटफॉर्मची येवजण राबयता. नव्या ‘रिंग रोड’ वांगडा ‘इंटर-मॉडल कनेक्टिव्हिटी’ सुरळीत करपी १२ मीटर रुंद चलत वचपा खातीर पूल आनी स्टेशन इमारती सयत दुसर्या प्रवेशद्वाराचोय प्रस्ताव आसा. नियोजीत आशिल्ल्या हेर सुविधानी एका नव्या स्टेबलिंग लायनचो आसपाव आसा, जाका लागून पिट लायन यार्डांतल्यो हालचाली सुदारतल्यो आनी शंटिंगचो वेळ उणो जातलो. मडगांव यार्डांत नवी पिट लायनीचो आसपाव करून घेवपाक एक सर्वेक्षण सुरू आसा; जाचे वरवीं नव्यो गाडयो सुरू करपाची येवजण राबयतले.
टप्प्याटप्प्यान जातलीं कामां
२०३० वर्सा मेरेन मडगाव जंक्शनाचेर गाडयो सुरू करपाची तांक दुपेटीन वाडोवपाच्या कामां खातीर कांय मुखेल कामां हातांत घेतल्यांत. हातूंत सध्याच्या टर्मिनल्सांत अतिरिक्त प्लॅटफॉर्म, स्टेबलिंग लाईन्स, पिट लायन्स आनी जायत्या शंटिंग सुविधांचेर भर दिवप. शारा भागांत आनी आशिकुशीक नवें टर्मिनल्स वळखप आनी तयार करप. मेगा कोचिंग कॉम्प्लेक्सा सयत सांबाळपाच्यो सुविधा निर्माण करप, तशेंच विवीध सुवातांचेर वाडिल्ल्यो गाडयो हाताळपाक गरजेची आशिल्ली येरादारी सुविधांचीं कामां, सिग्नलिंगाचें आधुनिकीकरण आनी मल्टीट्रॅकिंगा वरवीं विभागीय तांक वाडोवप अश्या कामांचो आसपाव आसा.
वाडपी प्रवाशांची मागणी पुराय करपा खातीर आनी गर्दी उणी करपा खातीर मुखेल शारांतल्या कोचिंग टर्मिनल्सचो विस्तार करतात. ह्या निर्णयाक लागून रेल्वे नेटवर्कचें आधुनिकीकरण जातलें आनी देशभरच्या कनेक्टिव्हिटींत मात्शी सुदारणा जातली, अशी म्हायती रेल्वे, म्हायती आनी प्रसारण, इलेक्ट्रॉनिक्स आनी म्हायती तंत्रज्ञान मंत्री अश्विनी वैष्णव हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
