भांगरभूंय | प्रतिनिधी
बर्च क्लब बनावट भलायकी दाखलो प्रकरण
म्हापशें: हडफड्यां बर्च बाय रोमियो लेन दुर्घटणा प्रकरणांत ह्या क्लबा खातीर अबकारी खात्याचो (उत्पादन शुल्क) परवानो मेळोवपा खातीर कांदोळे भलायकी केंद्राचो बनावट दाखलो वापरिल्ल्या प्रकरणांत दुबावीत आरोपी लुथरा भावांच्या अटकपूर्व जामीन अर्जा आड दिल्लींतल्या पिडीत जोशी कुटुंबान हस्तक्षेप याचिका दाखल केल्या. संबंदीत अर्जा वेलो निवाडो म्हापशेंच्या अतिरिक्त सत्र न्यायालयान 13 जानेवारी मेरेन राखून दवरला.
बुधवारा सांजवेळा ह्या हस्तक्षेप अर्जाचेर सुनावणी जाली. हस्तक्षेप अर्जदार जोशी कुटुंबाचे वकील अॅड. विष्णू जोशी हांणी युक्तिवाद करतना सांगलें, ज्या दिसा लुथरा भाव आनी तांच्या वांगड्यांनी बर्च क्लबा खातीर फटीच्या दस्ताऐवजाच्या आदारान उत्पादन शुल्क मेळयलें त्या खिणा सावन बर्च क्लब दुर्घटणेचो मुद्दो उपस्थीत आशिल्लो.
दुबाविताची बेफिकीरी आनी हलगर्जीपणाक लागून 25 निश्पाप लोकांचो जीव गेलो. तांकां बलिदान दिवचें पडलें. हातूंत जोशी कुटुंबांच्या चौग जाणांक मरण आयलें. हे दुर्घटणेंतल्यान वाटाविल्ली एकसुरी वांगडी भावना जोशी ही न्यायालयांत आसा.
दुबावीत लुथरा भावां कडल्यान तांचे वेल्या बनावट दाखलो प्रकरणांतल्या अटकपूर्व जामीन अर्जांत आमी हस्तक्षेप करूंक शकना, असो दावो केलाे. पूण संबंदितांचो हो युक्तिवाद अजापीत करपी दिसता. आमी पिडीत आसून आमचो आवाज चेपोवन उडोवपाचो येत्न जायत आसा. ताका लागून हो हस्तक्षेप अर्ज मान्य करचो अशी विनंती अॅड. जोशी हांणी न्यायालया कडेन केली.
लुथरा भावांच्या वकिलान युक्तिवादा वेळार सांगलें, पिडीत कुटुंब ह्या बनावट दस्ताऐवज प्रकरणांत हस्तक्षेप याचिका दाखल करूंक शकना. तांचो थेट संबंद हांगा येना. जो अर्ज जोशी कुटुंबान सादर केला तो एक सामान्य अर्ज आसून जातूंत संबंदितांची भुमिका ही गंभीरपणाची नाशिल्ल्याचें स्पश्ट जाता. अर्जांत संबंदीत अर्जदारांचें नांव नमूद नासून, तांणी विरोधा खातीर नेमकीं कारणां दिल्लीं नात.
बनावट एनओसी प्रकरणांत, अर्जदार स्वताक पिडीत म्हणूंक शकनात. हीं कागदपत्रां बनावट करपाचो कथीत गुन्यांवांत पिडीत कुटुंबाचेर कसलोच परिणाम जाल्लो ना. ताका लागून ह्या प्रकरणांत हस्तक्षेप करपाचो तांकां कायदेशीर अधिकार ना असो युक्तिवाद सौरभ लुथरा आनी गौरव लुथरा हांच्या वकिलान केलो.
मजगतीं, दोनूय पक्षाचे युक्तिवाद आयकले उपरांत ह्या अर्जा वेलो निवाडो 13 जानेवारी दिसा दितले अशें न्यायाधीश द्विजपल पाटकार हांणी आदेश दीत तो मेरेन सुनावणी तहकूक केली.
बुधवारा पिडीत जोशी कुटुंबाचे चौग जाण सोयरे न्यायालयांत सुनावणे वेळार हाजीर आशिल्ले. बर्च दुर्घटणेंतल्यान वाटाविल्ली पिडीत भावना जोशी हांचे सयत तांचे चार सोयरे आपल्या मरण आयिल्ल्यांचे फोटे घेवन सुनावणी सोंप मेरेन उक्त्या कोर्ट रुमांत उबे रावले आनी तांणी न्यायाधिशांचे भावनीक नदरेन लक्ष ओडपाचो यत्न केलो. फाटल्या कांय सुनावणी वेळार हजर रावन ह्या प्रकरणांत दुबावितांचो जामीन वा अटकपूर्व जामीन अर्ज मंजूर जावचो न्हय म्हणून हें पिडीत कुटुंब न्यायालया कडेन भावनीक मागणी करीत आसा.
साकवाडी हडफड्या बर्च बाय रोमियो लेन क्लब दुर्घटणा प्रकरणांत हडफडें नागवाचे अपात्र सरपंच रोशन रेडकार आनी सरकारी सेवेंतल्यान बडतर्फ केल्ले पंचायत सचीव रघुवीर बागकार ह्या दोगांकूय अंतरीम थाकाय दिवपाक गोंयच्या मुंबय उच्च न्यायालयान न्हयकार दिला. मजगतीं, ह्या प्रकरणाची फुडली सुनावणी शुक्रारा 9 वेर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
