भांगरभूंय | प्रतिनिधी
कार्यालय करासवाड्यार हाडपाची समाज वावुरप्यांची मागणी
भांगरभूंय । प्रतिनिधी
म्हापशें : उदका स्रोत खात्यान म्हापशेंचें कार्यालय अचकीत पर्वरेच्या सिंचन भवनांत स्थलांतर केल्ल्याच्या प्रकाराचेर म्हापशेंच्या समाज वावुरप्यांनी खर नाराजी उक्तायल्या. करासवाड्यार स्थलांतर जावपी हें कार्यालय पर्वरे कशें व्हेलें, असो प्रस्न तांणा उपस्थीत केलो. ह्या प्रकाराक लागून थळाव्या लोकांनी चड करून थिवी, शिवोली, हळदोणें आनी कळंगूट वाठारांतल्या सुमार लाखभर लोकांक गैरसोय जातली, हे खातीर हें कार्यालय म्हापश्यां परत हाडचें, अशी मागणी समाज वावुरप्यांनी केल्या.
मेळिल्ले म्हायती प्रमाण, बार्देस म्हालांतले साळगांव आनी पर्वरी सोडून म्हापशें, थिवी, हळदोणें, शिवोली आनी कळंगूट ह्या पांच मतदारसंघांतल्या लोकांक सेवा दिवपी उदका स्रोत खात्याचें कार्यालय म्हापशेंच्या पेयजल पुरवण कार्यालय इमारतींत चलतालें. इमारतीच्या नुतनीकरणा कातीर पेयजल खात्यान ती सुवात रिती करपाची सुचोवणी उदका स्रोत खात्याक केल्ली. ते प्रमाण हें कार्यालय उतका स्रोत खात्याच्या करासवाड्या वयल्या काडा (सीएडीए) इमारतीच्या तळमाळ्यार हाडपाचें आशिल्लें, पूण अचकीत डिसेंबराच्या मध्याक हें कार्यालय पर्वरेच्या सिंचन भवनांत व्हेलें. बार्देस म्हालांतले चड करून गांवगिऱ्या वाठारांतले लोक व्हड संख्येन ‘नितळ बाय नितळ गोंय’ सयत विवीध बांयां कडेन संबंदीत येवजण्यांचें अनुदान मेळोवपा खातीर ह्या कार्यालयाक भेट दिताले. ते भायर टँकराची नोंदणी आनी हेर कामा खातीर वेवसायीक लोक ह्या कार्यालयांत येतात. सध्या हें कार्यालय स्थलांतरी केल्ल्यान ह्या लोकांची गैरसोय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
