भांगरभूंय | प्रतिनिधी
लोकचळवळ सभेंतल्या मागण्यांचेर विचार करून घेतले निर्णय
पणजी : पणजेचे बसकेंत जाल्ल्या मागण्यांचें निवेदन म्हजे मेरेन पावलां. ताचेर विचार करून निर्णय घेतले. लोकांक जाय तेंच आमी करतले, अशी प्रतिक्रीया मुख्यमंत्री डॉ. प्रमोद सावंत हांणी उक्तायली. मंत्रिमंडळ बसके उपरांत उलयतना तांणी ही प्रतिक्रीया उक्तायली. गोंय वाटावपा खातीर नगरनियोजन कायद्यांतल्या कलम १७(२) आनी ३९(ए) रद्द करपा वांगडा भायल्या लोकांक जमीन विकपाचेर निर्बंध हाडपाची मागणी मंगळारचे बसकेंत जाल्ली. निवृत्त न्यायाधीश फेर्दिन रिबेलो हांच्या नेतृत्वा खाला जाल्ले हे बसकेक व्हडलो प्रतिसाद मेळिल्लो. कॅसिनो मांडवी भायर काडपा वांगडा जमीन रूपांतरणाक जापसालदार आशिल्ल्या खात्यांच्या अधिकार्यांचेर कारवाय करपाची मागणीय हे सभेंत जाल्या.
बर्च चवकशी अहवाल : चर्चे विशीं म्हायती दिवपाक न्हयकार
बर्च घडणुके प्रकरणांत विधानसभेंत चर्चा करपा वांगडा दंडाधिकार्यांचो चवकशी अहवाल उक्तो करपाची मागणी विरोधी आमदारांनी केल्या. अधिवेशनांत वंदे मातरमाचेर चर्चा जातली असो निर्णय जरी जाला तरी बर्च चर्चे विशीं म्हायती दिवपाक मुख्यमंत्र्यांनी न्हयकारलें. हो अधिवेशनांतलो कामकाजाचो भाग आशिल्ल्यान आतांच कांय सांगपाक मेळचें ना, अशें मुख्यमंत्री हांणी हे विशींच्या प्रस्नाचेर उलयतना म्हणलें.
१५७ फिल्ड सर्वेयर
भू सर्वेक्षण संचालनालयांतल्या कर्मचार्यांची संख्या वाडोवपाक मंत्रिमंडळान मान्यताय दिल्या. खात्यांत अतिरिक्त संचालकां सयत फिल्य सर्वेयरचीं १५७ पदां कर्मचारी भरती आयोगा वरवीं भरतले, अशी म्हायती मुख्यमंत्री डॉ. प्रमोद सावंत हांणी दिली.
जिमाक मेळटलो खासगी विद्यापीठाचो दर्जो
गोवा इन्स्टीट्यूट ऑफ मॅनेजमेंट संस्थेक (जीम) खासगी विद्यापीठाचो दर्जो दितले. हे खातीर विधानसभेंत जिम खाजगी विद्यापीठ विधेयक सादर करतले. ह्या विधेयकाक मंत्रिमंडळान मान्यताय दिली.
अधिवेशनांत सादर जावपी हेर विधेयकां
-मोपा विमानतळ विकास प्राधिकरण दुरूस्ती विधेयक (कायम स्वरूपाचीं पदां भरपाची तरतूद)
-गोंय भूमहसूल संहिता १९६८ दुरूस्ती विधेयक (भाटकारांच्या जमीन विक्रीचेर निर्बंधांची तरतूद)
-गोंय जनविस्वास दुरूस्ती विधेयक
-गोंय वॅट दुरूस्ती विधेयक
-भारतीय नागरीक सुरक्षा संहिता विधेयक
एससी, ओबीसी विद्यार्थ्यांचें ३.२० कोटींचें व्याज माफ
एससी आनी ओबीसी महामंडळा वतीन दिवपी शिक्षणीक रिणांतल्या ३.२० कोटींची व्याजाची रक्कम माफ केल्या. शिक्षणीक रीण घेतिल्ल्या ५०० विद्यार्थ्यांक आतां फकत रिणाची रक्कम फेडची पडटली. व्याज माफ केलां.
मंत्रिमंडळाचे हेर निर्णय :
-मडगांव रवींद्र भवन दुरूस्तीच्या ४.५ कोटी खर्चाक मान्यताय.
-बिरसा मुंडा जयंतीच्या १६ कोटीच्या खर्चाक मान्यता.
-गोमेकॉत ऑन्कोलॉजींत ३ डॉक्टरा सयत हेर विभागांत प्राध्यापकांची कंत्राटी तत्वाचेर भरती.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
