भांगरभूंय | प्रतिनिधी
पणजी : भगवान महावीर वन्यजीव अभयारण्य आनी राष्ट्रीय उद्यानांत काळो बिबटो (ब्लॅक पॅन्थर) मरण आयिल्ले अवस्थेंत सांपडलो. ह्या वाठारांतल्या ट्रान्सफॉर्मराचो विजेचो धक्को लागिल्ल्यान ताका मरण आयलां आसतलें, असो दुबाव रान अधिकार्यांनी उक्तायलो. तरी ह्या प्रकरणांत नेमां प्रमाण आनी एसओपी पाळून तपास करतात.
हे विशीं म्हायती मेळटांच रान विभागाच्या पंगडान मरण आयिल्ल्या बिबट्याक रोखडेंच ताब्यांत घेवन फुडल्या सोपस्कारा खातीर धाडलें. एका रान अधिकार्यान , पोस्टमार्टम केला. हे विशीं चवकशीय सुरू आसा. ह्या वाठारांत आशिल्ल्या ट्रान्सफॉर्मरांतले विजेचो धक्को लागिल्ल्यान काळ्या बिबट्याक मरण आयिल्ल्याचें दिसता, अशें तांणी सांगलें.
कार्यपद्धती प्रमाण, रानजिवांक असैमीक मरण आयल्यार रानजीव (संरक्षण) कायदो, १९७२ च्या तरतुदीं प्रमाण गुन्यांव दाखल करतात आनी खोलायेन चवकशी करतात. ह्या प्रकरणांत सगल्यो कार्यपद्धती आनी मानक कार्यप्रणाली (एसओपी) खोलायेन पाळून फुडली चवकशी करतात अशें रान विभागान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
