भांगरभूंय | प्रतिनिधी
२ सेकंद परस चड वेळा खातीर वाहनां कडल्यान घेतलें अतिरीक्त शुल्क
पणजी : मनोहर (मोपा) विमानतळावेल्या ऍप्रोच रोडार फकत २ सेकंद चड वेळ वाहनां थारयिल्ले खातीर त्या वाहनांक अतिरिक्त शुल्क आकारपाचो प्रकार मोपा विमानतळार घडलो. ह्या प्रकरणांत गोवा सरकाराच्या नागरी हवाई येरादारी संचालकांनी जीएमआराक कारणां दाखयात नोटीस जारी केल्या. ह्या प्रकरणांत करारांतल्या कलमाचो भंग केल्ल्या प्रकरणांत कारवाय कित्याक करची न्हय, अशी नोटीस जारी केल्या. जीएमआराक ७ दिसां भितर नोटिसीक स्पश्टीकरण दिवप गरजेचें.
मोपा विमानतळार पार्किंग शुल्काचो वाद अदींमदीं जाणवत आसता. खासगी टॅक्सीवाल्यां कडल्यान अतिरिक्त पार्कींग शुल्क घेतात, अश्यो कागाळी आसतात. हाचे वेल्यान टॅक्सीवाल्यांचीं बरींच आंदोलनांय जाल्यांत.
सरकारी खाजगी भागीदारीचेर (पीपीपी) मोपा विमानतळ चलोवपा खातीर जीएमआर आनी नागरी विमान येरादारी संचालनालया मजगतीं करार जाला. ह्या करारांतल्या २०.५.२ कलमां प्रमाण विमानतळावेल्या रस्त्यांचो वापर करतना वाहनाक पीक आवर्सांत २ मिनटां, जाल्यार ऑफ पीक आवर्सांत ५ मिनटां थारपाची मेकळीक आसा. पीक आवर्साक २ मिनटां परस चड काळ, जाल्यार ऑफ पीक आवर्साक ५ मिनटां परस चड काळ वाहनां थारल्यार तांचे कडल्यान अतिरिक्त शुल्क घेवपाची मेकळीक आसा. तरी २३ डिसेंबर २०२५ दिसा वाहनांचे २ सेकंदां खातीर अतिरिक्त शुल्क घेतले. हो करारांतलो २०.५.२ कलमांचो भंग थारता. हाचेर सरकारान जीएमआरकडेन स्पष्टीकरण मागलां. जीएमआरच्या मुखेल कार्यकारी अधिकार्यांक (सीईओ) ही नोटीस धाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
