भांगरभूंय | प्रतिनिधी
मडगांव: मतदार पुर्नरिक्षण कार्यावळी खाला दावे, हरकती हांचे वेल्या अर्जांचेर सुनावणी घेतात. ज्येश्ठ नागरिकां खातीर विशेश सोय करतले. गरजे प्रमाण चड वेळ सुनावणी सुरू दवरतले. मतदारां कडल्यान सादर केल्लीं कागदपत्रां मूळ अधिकारिणी कडल्यान पडटाळणी करपाक कळाव जायत आशिल्ल्यान पुराय प्रक्रियेक कळाव जायत आशिल्ल्याची म्हायती दक्षीण गोंय जिल्होधिकारी एग्ना क्लिटस हांणी दिली.
गोंयांत मतदार पुर्नरिक्षण कार्यावळ सुरू आसून तेप्रमाण 1,42 लाख मतदारांचीं नांवां वगळ्ळ्यांत. हातूंतले अर्ज दिवंक नाशिल्ल्या, उपलब्ध नाशिल्ल्या 2002च्या मतदार वळेरेंत नांव नाशिल्ल्या खूबशा जाणांक परतून कागदपत्रां सादर करचीं पडटात. हे खातीर दक्षीण गोंय जिल्होधिकारी कचेरेंतल्या केंद्रा भायर लोकांची रांग लागत आसा. हाचेर विचारतकच, जिल्हो वेंचणूक अधिकारी तशेंच जिल्होधिकारी एग्ना क्लिटस हांणी सांगलें, वेंचणूक आयोगा कडल्यान आयिल्ल्या निदेशा प्रमाण मतदार वळेरी पारदर्शक आसची हे खातीर काम करतात. अर्जा फाटल्यान दिल्ल्या 12 कागदपत्रां पैकीं खंयच्याच कागदपत्रांचो स्विकार अधिकाऱ्यां कडल्यान करिनात.
जल्मप्रमाणपत्र आनी पासपोर्ट हे सहज उपलब्ध जायत आशिल्ल्याचे ताची मागणी करतात आसुये. पूण ताचे बगर 12 कागादपत्रां पैकीं हेर कागदपत्रां स्विकारतात. योग्य कागदपत्रां नासल्यार मतदाराक परतून आपयतात. कागदपत्रां जमा केले उपरांत जल्मप्रमाणपत्र वा हेर खंयचोय पुरावो हो ज्या अधिकारिणीन तो जारी केला, तांचे कडल्यान तो खरो आशिल्ल्याची पडटाळणी करून घेतात. ह्या कागदपत्रांच्या पडटाळणीक खूबशा खात्यांचो संबंद येत आशिल्ल्यान प्रक्रियेक कळाव जाता. ते खातीर संबंदीत खात्यां सयत बँक, पोस्ट अधिकारी हांचे कडेन बसका घेवन तत्काळ प्रतिसाद दिवपाचे निदेश दिल्यात. कागद पडटाळणी जाले उपरांत मतदारांचीं नांवां वळेरेंत आस्पावीत करतात.
मतदार रांगो लायत आशिल्ले खातीर उलयतना जिल्होधिकारी क्लिटस हांणी सांगलें, कांय अधिकाऱ्यांच्या केंद्रांचेर चड मतदारांचें अर्ज आसतात. तांचे कडल्यान सकाळ सावन सांजवेळ मेरेन सुनावण्यो घेतात. शेनवारा आनी केन्ना तरी आयताराय कामा खातीर अधिकारी आनी कर्मचारी येत आसतात. काम दिल्ल्या वेळांत पुराय करपा खातीर यत्न करतात. हातूंत जाण्टी व्यक्ती, दुयेंत व्यक्ती हांचे कडल्यान पत्र घेवन आयल्यार तशेंच तांचें फोटू दाखयल्यार तांची कागदपत्रांय दुसऱ्या व्यक्ती कडल्यान स्विकारतात अशें तांणी सांगलें.
कालावधी वाडोवपाची आयोगाक विनंती
ज्येश्ठ नागरिकांक रांगेंत रावन कळाव जावचो न्हय म्हूण तांचे खातीर विशेश सोय करतले. पूण, एसआयआर खातीरचो काळ वाडोवप हें वेंचणूक आयोगाच्या हातांत आसा. कागदपत्रांच्या पडटाळीक लागपी कळाव पळयत जाल्यार कालावधीत वाड करपाची विनंती राज्य वेंचणूक आयोगा कडेन केल्ल्याचें जिल्हो वेंचणूक अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
