भांगरभूंय | प्रतिनिधी
दक्षीण गोंय खासदार विरियातो फर्नांडीसान दाखल केलें विधेयक
भांगरभूंय । प्रतिनिधी
पणजी : गोंयची जमीन, पर्यावरण तशेंच अस्मिताय सांबाळपा सयत निधी मेळपा खातीर खासा दर्जो मेळप गरजेचो आसा. हाचे खातीर लोकसभेंत खासा खासगी विधेयक हांवें दाखल केलां, अशें दक्षीण गोंयचे खासदार विरियातो फर्नांडीस हांणी सांगलें. पणजे घेतिल्ले पत्रकार परिशदेंत तांणी ही म्हायती दिली.
ह्या वेळार सरचिटणीस अॅड. श्रीनिवास खलप, जिल्हो अध्यक्ष विरेंद्र शिरोडकार आनी सावियो डिसील्वा हाजीर आशिल्ले. गोंयची संस्कृती आनी जमिनीचो सांबाळ करपाच्या हेतान हें विधेयक सादर केलां, अशें विरियातो फर्नांडीस हांणी सांगलें. गोंयचो सांबाळ करपा खातीर काँग्रेस पक्ष सगळे तरेचे यत्न करतलो. गोंय सांबाळपा खातीर जमीन, शेती, पर्यावरण हाची जतनाय जावपाक जाय. हे हेतान विरियातो फर्नांडीस हांणी सादर केल्लें विधेयक योग्य आसा, अशें श्रीनिवास खलप हांणी सांगलें.
विधेयकांत गोंय संतुलीत उदरगत मंडळ स्थापन करपाची तजवीज आसा. राज्याचे मुख्यमंत्री मंडळाचे अध्यक्ष आसतले. खासदार, तज्ञ तशेंच हेर संबंदीत वांगडी आसतले. गोंयचे पर्यावरण, संस्कृती, जमीन तशेंच उदरगती विशीं हें मंडळ मार्गदर्शन करतलें. गोंयची संस्कृती, दायज, कला जतनाय करपाची तजवीज आसा. गोंयच्यो न्हंयो, जमनी, पर्यावरण, शेतां सांबाळपा खातीर खासा दर्जाची तजवीज विधेयकांत आसा. रोमी आनी देवनागरी कोंकणी सयत मराठी भाशेक उर्बा दिवपा खातीर उपाय येवजण्यो आसात. मूळ गोंयकार कोण हाची व्याख्या आसा. तशेंच पर्यावरणाची जतनाय करचे खातीर राज्यपाल तशेंच राष्ट्रपतींक हस्तक्षेप करपा खातीर खासा अधिकार आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
