भांगरभूंय | प्रतिनिधी
मुख्यमंत्री : रोजगारा सयत उदरगतीच्या प्रकल्पांचें प्रमाण वाडटले
भांगरभूंय । प्रतिनिधी
पणजी : आदले मनरेगा येवजणेंत बदल करून कामाचे दीस वाडोपाची तजवीज आशिल्ले नवे ‘विकसीत भारत जी राम जी’ येवजणेचो गोंयांक व्हड प्रमाणांत फायदो जातलो. रोजगारा सयत उदरगतीच्या प्रकल्पांचें प्रमाण वाडटलें, अशें मुख्यमंत्री डॉ. प्रमोद सावंत हांणी म्हणलां.
मुख्यमंत्री डॉ. प्रमोद सावंत पत्रकार परिशदेंत उलयतालें. ह्या वेळार उदका पुरवण खात्याचे मंत्री सुभाष शिरोडकार आनी वीज मंत्री सुदीन ढवळीकार हाजीर आशिल्ले.
फाटल्या वर्सा मनरेगा येवजणेत देश पांवड्यार 193 कोटी निधीचो गैरवेव्हार जाला. गोंयांत मात एकाय पयशाचो गैरवेव्हार जावंक ना, अशें मुख्यमंत्र्यांनी सांगलें. पयलीचे मनरेगा येवजणेंत 100 दिसांच्या कामाची तजवीज आशिल्ली. नवे येवजणेंत 125 दिसांच्या कामाची तजवीज आसा. तशेंच येवजणेंत जे कितें उणाव आशिल्ले ते पयस करून सुदारीत येवजण केंद्र सरकारान लागू केल्या. विकसीत भारत जी राम जी विधेयकांत पयलीचे येवजणेंत खूबश्यो सुदारणा केल्यात. विधवा बायल, दिव्यांग, ज्येश्ठ नागरीक हांकां रोजगार ग्राम कार्डां दितले. तशेंच गांवगिऱ्या वाठारांतले मुळावे प्रकल्प, रोजगार संबंदीत येवजण्यो, उदका खातीरचे बांद आनी हुंवार वा आपत्ती सावन संरक्षण करपी प्रकल्प येवजणे खाला हातांत घेतले. कामां खातीर 60 टक्के निधी केंद्रा कडल्यान जाल्यार 40 टक्के निधी राज्य सरकारचो आसतलो. गांवगिऱ्या अर्थवेवस्थेक उर्बा दिवपाची तजवीज आसा, अशें मुख्यमंत्री डॉ. प्रमोद सावंत हांणी सांगलें. पंचायत तशेंच जिल्हो पंचायती वरवीं येवजणेचीं कामां जातली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
