भांगरभूंय | प्रतिनिधी
पणजी : फाटल्या सप्तकाचे तुळेंत सोमारा पणजी बाजारांत कांय भाजयो म्हारग जाल्ल्यो. बाजारांत कांदे 10 रुपयांनी म्हारग जावन 450 रुपया जाले. भेंडें, घोसाळीं, ढब्बू मिरसांग 20 रुपयान म्हारग जावन दरेकी 100 रुपया कील जाल्या. लसूण 400 रुपया कील जाल्या. जाल्यार कोबी 10 रुपयांनी म्हारग जावन 50 रुपया कील जाला. बाजारांत हेर भाजयांचे दर स्थीर आशिल्ले.
सोमारा चिटकी 20 रुपयांनी म्हारग जावन 100 रुपया कील जाली. ल्हान वांयगीं 60 रुपया जाल्यार व्हडलीं वांयगीं 80 रुपया कील आशिल्लीं. मिरसांग दर्जा प्रमाण 80 ते 100 रुपया कील आशिल्ली. तवशीं 50 रुपया कील मेळटाली. बटाट 40 रुपया कील जाल्यात. वालपापडी दर्जा प्रमाण 100 ते 120 रुपया कील विकताले. आलें 20 रुपयांनी म्हारग जालां आनी तें 180 रुपया कील जालां.
बाजारांत टमाटां 10 रुपयांनी सवाय जावन 60 रुपया कील विकताले. गाजर 20 रुपयांनी सवाय जाले आनी 60 रुपयांनी कील मेळटाले. भोवरी (ल्हान दुदी) 40 रुपयांक एक नग विकताले. आवक वाडिल्ल्यान बाजारांत मटार सवाय जाल्यात. ते 80 ते 100 रुपयांनी कील मेळटाले. नाल्ल आकारा प्रमाण 30 ते 50 रुपया नग मेळटालो.
बाजारांत मेथी 25 रुपया जुडी आशिल्ली. पालक 15 रुपया जाल्यार शेपू आनी कोथमीर 20 रुपया जुडी आशिल्ली. लिंबी 3 रुपयांक 1 नग विकताले.
सोमारा फलोत्पादन मंडळाच्या गाड्यांचेर भेंडे 59 रुपया, कोबी 24 रुपया, फ्लॉवर 27 रुपयांक एक नग, गाजर 45 रुपया, वालपापडी 54 रुपया, मिरसांग 65 रुपया, कांदो 30 रुपया, बटाट 27 रुपया जाल्यार टमाट 55 रुपयांक कील विकताले.
म्हस्काच्यो सांगो किलाक 600 रुपया
बाजारांत म्हस्काच्या सांगांची आवक उणी जाल्या. शारांत कांय थारावीक सुवातांचेरूच म्हस्काच्यो सांगो उपलब्ध आसात. त्यो 600 रुपयांक कील ह्या दरान विकताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
