भांगरभूंय | प्रतिनिधी
गोंयांत जायत्यो सेवाभावी संस्था आसात. संघटना खूब आसात, जायते राजकी पक्ष आसात, पूण कोणूच गोंयाक गंभीरतायेन घेनात. पूण निवृत्त न्यायाधीश रिबेलो हांणी उखलिल्ल्या पावलाक येवकार फावता.
निवृत्त न्यायाधीश फेर्दिन रिबेलो हांचो नव्या वर्साचो संकल्प गोंयच्या लोकांक जागृत करपी आसा. गोंयचे जमनीची राखण करपाक सामुहीक चळवळ सुरू करपाचें तांणी थारायलां. आयज तिचें घडये लोकार्पण जातलें. नागरिकांनी खऱ्यांनीच हाचेर विचार करचो. गोंयच्या जमनीचें व्हडा प्रमाणांत रुपांतर जावपाक लागलां. दिल्लींतले जायते बिल्डर गोंयचे जमनीचेर वाकडी नदर दवरुन आतात, दर्यादेगेवेलीं जायतीं हॉटेलां दिल्लींतल्या हॉटेल लॉबीच्या हातांत गेल्यांत. गोंयांत तांची दादागिरी पळयल्यार आनी हालींच हडफडें उज्याची घडणूक पळयल्यार गोंयच्या लोकांनी खंय तरी जागें जावप गरजेचें. विरोधी पक्ष जागृताये खातीर जाय तितलो वावुरना. सरकाराचेर कोणाचेंच चेंपण ना आनी लोक एकवटीत नात. देखून सरकार फावलां.
न्या. रिबेलो हांचे मदीं कांय प्रमाणांत अस्वस्थताय आशिल्ली, ती तांकां विसव घेवपाक दिना. तांची एकंदर तळमळ पळयल्यार तरणाटे लेगीत लजतले. गोंयांत जायत्यो सेवाभावी संस्था आसात. संघटना खूब आसात, जायते राजकी पक्ष आसात, पूण कोणूच गोंयाक गंभीरतायेन घेनात. पूण निवृत्त न्यायाधीश रिबेलो हांणी उखलिल्ल्या पावलाक येवकार फावता.
न्या. रिबेलो हांचो आतां मेरेनचो वावर नवे पिळगेक खबर आसचो ना. ते एक कुशळ वकील, समाजसेवक. ते जायत्या समाजीक वावरां कडेनय संबंदीत आसात. सदांच गोंय आनी गोंयचे अस्मितायेचो विचार करपी. गोंय विधानसभेंत आमदार म्हणूनय भुमिका करपी रिबेलो, राजकारण सोडून आपली वकिसी वेवसाय परतून सुरू करपी, सदांच निपक्षपातीपणाची भुमिका घेवपी. ताची एकंदर विद्वान म्हूण आनी भ्रश्टाचारान केन्नाच कलंकीत नाशिल्ली अशी प्रतिमा. तांच्या अणभवाक लागून तांची थेट उच्च न्यायालयांत न्यायाधीश म्हणून नेमणूक जाली. उपरांत ताका बडटी मेळ्ळी आनी अलाहाबाद उच्च न्यायालयाचे मुखेल न्यायाधीश म्हणून ते निवृत्त जाले.
थंयच्यान ते परत गोंयांत आयले. तांकां दिसता की गोंय खंय तरी वाट चुकता, भरकटता. सगळेकडेन कायदेशीर झूज करीत रावल्यार न्याय मेळपाक कळाव जातलो. तो मेरेन गोंयचो चडसो वाठार दिल्लींतल्या बिल्डरांच्या हातांत वतलो, आनी थळाव्या राजकी पांवड्यार हाचे आड खंयचोच राजकी पक्ष भुमिका घेवचो ना, आनी आमचें गोंय आपली वळख वगडायतलें, हो धोको वळखून पोटतिडकीन न्या. रिबेलोन चळवळ सुरू करपाचें थारायलां.
आयज मेरेनच्या तांच्या प्रवासाचेर नदर मारल्यार तांणी सदांच उंचेलो पांवडो सांबाळून आपल्यो वेगवेगळ्यो चळवळी केल्यात. गोंयांत दर्यादेगेवेल्या वाठारांनी व्हड प्रमाणांत बेकायदेशीर बांदकाम चालू आसात, बेकायदेशीर हॉटेलां, सगल्या नेमांक आडनदर करून व्हड प्रमाणांत सोरो विक्री केंद्रां चलतात. तातूंत व्हड प्रमाणांत ड्रग्स विक्री चलता. हें सगळें सोंसपा पलतडी आशिल्ल्यान न्यायमूर्ती रिबेलोन घेतिल्लो संकल्प पुराय करपा खातीर गोंयकारांनी तांकां तेंको दिवचो, अशें म्हाकाय गोंयकार म्हूण दिसता.
गजानन भाटकार,
आल्त- पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
