भांगरभूंय | प्रतिनिधी
पोर्टलार विद्यार्थ्यां खातीर २३ भाशेचीं ५५०० पुस्तकां उपलब्ध
पणजी : अभ्यासांत तशेंच विद्यार्थ्यांच्या सर्वांगीण उदरगतींत वाचनाचें म्हत्व परस्पर साधारण आसा. डिजीटल साक्षरते वांगडाच विद्यार्थ्यांक वाचनाची संवय लागपा खातीर विद्यालयांनी राष्ट्रीय ई पुस्तकालय पोर्टलाचेर नोंदणी करून पोर्टलार उपलब्ध सुविधांचो उपयोग करचो, अशें परिपत्रक शालान्त मंडळान जारी केलां.
राज्यांतलीं सगलीं विद्यालयां तशेंच उच्च माध्यमीक विद्यालयांक हें परिपत्रक धाडलां. राष्ट्रीय ई पुस्तकालय पोर्टलार पुस्तकां आनी हेर सुविधांचो उपेग विद्यार्थ्यांनी करचो, अशें पत्र केंद्रीय शिक्षण मंत्रालयाच्या शालेय शिक्षण खात्यान धाडलां. ह्या पत्रावेल्यान शालान्त मंडळान परिपत्रक जारी केलां.
राष्ट्रीय ई पुस्तकालय पोर्टलार २३ भारतीय भाशां मदलीं ५५०० पुस्तकां उपलबध आसात. सुमार २०० प्रकाशकांचीं ही पुस्तकां विवीध पिरायेच्या भुरग्यां खातीर सामकीं उपेगी. राष्ट्रीय शिक्षण धोरणाक धरून खंयच्या पिरायेच्या गटा खातीर खंयचीं पुस्तकां वाचना खातीर योग्य आसात, हाची वळेरीय तयार केल्या. ३ ते ८, ८ ते ११, ११ ते १४ आनी १४ वर्सां वयले विद्यार्थी अशे तरेन पुस्तकांची वर्गवारी केल्या. हाका लागून खंयचें पुस्तक खंयच्या विद्यार्थ्याक वाचना खातीर उपलब्ध करचें हें थारावप शिक्षकां खातीर सुरळीत जातलें. (http://ndl.education.gov.in/home), ह्या पोर्टलाचेर अँड्रोयडचे मजतीन नोंदणी केल्यार सगलीं पुस्तकां उपलब्ध जातलीं. पुस्तकां आनी मजकुराची निवड तज्ञांचे मजतीन केल्या. पोर्टलचो शिक्षक तशेंच विद्यार्थ्यांनी चडांत चड प्रमाणांत उपेग करचो, अशे निर्देश विद्यालयांक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
