भांगरभूंय | प्रतिनिधी
मडगांव : देशांतल्या फुडार्यां विशीं आतां मेरेन एक ‘नरेटिव्ह’ सेट केल्लो. सगल्या गजालींचें ‘कॉंग्रेसीकरण’ करपाचो यत्न जाल्लो. म्हणून धर्म आनी राष्ट्रा खातीर कार्य केल्ल्या सगल्या सुटके झुजार्यांची नवे पिळगेक वळख जावची म्हणून भाजप विवीध कार्यावळींचें आयोजन करता. त्यो फकत मनरिजवणे खातीर न्हय, तर ताचे फाटल्यान प्रबोधनाचा उदात्त हेतू आसा, अशें भाजप प्रदेशाध्यक्ष दामू नायक हांणी सांगलें.
मडगांवच्या ‘बुलबुल आंतरराष्ट्रीय बाल चित्रपट महोत्सवा’चे कार्यावळींत ते उलयताले. भुरग्यांचो फुडार पर्जळपा खातीर आवय-बापूय, शिक्षक आनी चित्रपट हे तीन घटक म्हत्वाचे थारतात. चित्रपटांचो मनाचेर व्हड परिणाम जाता आनी भुरगीं चित्रपटांतल्या कथांचें अनुकरण करतात. हाका लागूनच देशा खातीर आनी धर्मा खातीर काम केल्ल्या महापुरसांचे चित्रपट भुरग्यांक दाखोवप गरजेचें, अशें तांणी सांगलें. प्रधानमंत्री मोदीजींचे संकल्पने प्रमाण, ह्या चित्रपट महोत्सवांतल्यान भुरग्यांक बर्या जेवणाची म्हायती आनी गोंयचे परंपरीक जीनस खावपाक दिवपाची आनी संस्कृतीची वळख करून दिवपाचो यत्न आसा. सात्वीक जेवण ही काळाची गरज आसा. हातुंतल्यान रोजगार निर्मितीय जावपाक शकता, अशे तांणी सांगलें.
लोकांक बिरसा मुंडा, होळकर खबर नात
कांय लोक भाजपाच्या सेगीत जावपी कार्यावळींचेर प्रस्न करतात. मात, भाजपान बिरसा मुंडा हांच्यो यादी जागयल्यो, अटल स्मृती आनी बाल साहस दीस अशे नवे उपक्रम चालीक लायले. ह्यो कार्यावळी फकत वेळ घालोवपा खातीर न्हय, इतिहासाची पुनरावृत्ती टाळपा खातीर आसात. आयच्या भुरग्यांक विचारल्यार ते महात्मा गांधी वा पंडित नेहरू हांचींच नांवां घेतात, मात तांकां बिरसा मुंडा, झोरावर सिंह वा फत्तेसिंग ह्या राष्ट्रपुरुसांच्या बलिदानाची मात्तूय खबर आसना. अहिल्याबाई होळकरांची क्रांती तांकां खबर ना. इतलीं वर्सां मुद्दम थारावीक फुडार्यांचींच नांवां समाजांत रुजोवपाचो जो यत्न जालो, तो खोडून काडपाक भाजप वावुरता. नवे पिळगेन ह्या सुटकेझुजार्यांचो आदर्श घेवचो आनी तातुंतल्यानूच भारत ‘विश्वगुरू’ जावपाचे दिकेन वाटचाल करतलो, असो विस्वास नायक हांणी उक्तायलो.
थळाव्या चित्रपटांक फाटबळ गरजेचें आसा. बिपीन खेडेकार हांच्या उदाहरणाचो संदर्भ दितना नायक हांणी म्हणलें. तांच्या पयल्या चित्रपटाक जायते पुरस्कार मेळ्ळे. मात थळाव्या प्रेक्षकांचो प्रतिसाद नाशिल्ल्यान तांणी फुडली निर्मिती करपाक न्हयकार दिलो. गोंयच्या लोकांनी थळाव्या कलाकारांच्या कलाकृतींक फाटबळ दिवप सामकें गरजेचें, असोय उलो तांणी ह्या वेळार मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
