विज्ञान फाट्यांत वचप्यां खातीर वेगळी वाट

भांगरभूंय | प्रतिनिधी

तु मी जर विज्ञान फाट्यान प्रवेश घेतला तर तुमका दोतोर, अभियांत्रिक सोडून फॅशन ह्या फाट्याचो लेगीत विचार करूं येता. एक म्हणल्यार हातून तितलो ताण येना. फॅशन हो समाप्ती नाशिल्लो विशय, पूण गैरसमजाक लागून हो फांटो फक्त चलयांचो, बायलांचो अशें सगल्यांकूच दिसता. हालींच्या कांय वर्सांनी दादलेय ह्या मळार दिसपाक लागल्यात. हो फांटो कोणूय घेवपाक शकतात. खंयचो फांटो घेवन करियर करपाक सोदतात, तांकां पयलीं त्या विशयाची आवड आसपाक जाय. तुमी ह्या फाट्याक म्हत्व दितले तें दुसऱ्याक सांगपाक येवपाक जाय. दुसऱ्यांक सांगचे पयलीं तें पालकांक पटोवन दिवपाक कळपाक जाय.
जो मेरेन मनीस जात आसा, तो मेरेन फॅशन हो विशय मरचो ना. एका वेळार एकाच रंगाचे, मोदीचे कपडे लोक घालताले, मात आतां तरातरांच्यो मोदी, रंगांचे कपडे खेड्यांनी पसून लोक घालतात. फॅशन कसली आयल्या तें कळपाचो सोंपो मार्ग म्हणल्यार सिनेमा. पळोवंक गेल्यार सिनेमांत लोकप्रीय नट घालता त्या कपड्याची फॅशन येता. 1970 च्या दशकांत राजेश खन्ना घालता तो गुरू शर्ट खूब लोकप्रीय जाल्लो. मागीर सफारी सूट. अमिताभ आयलो तेन्ना बॅलबाॅटम खूब फामाद जाली. ताचे पयलीं साधना कट गाजिल्लो. अर्थांत ही फॅशन पयशेकारा वा सिनेमा पळोवप्यां पुरती मर्यादीत आशिल्ली. सलवार- कमीज हो पंजाबी भेस सिनेमां खातीरुच गोंयांत पावलो. दांडिया हो नाच गुजराती आसलो तरी आमी कोंकणी मनशांनी आपणायला तशेंच फॅशनीचें. खंयचे खंयचे कपडे खंय पावले आयनी फॅशनी तयार जाल्यो, हें कळप कठीण. हो अभ्यासाचो विशय.
आमचो गोंयकारांचो खरो भेसूच आमी विसरून गेल्यात. आसूं. एका नव्या संवसारांत तुमी पावतले, जाल्यार तुमकां ह्या फांट्यांत येवचें पडटलें. ताचे पयलीं तयारी जाय. कपड्याचो पोत, सुत, धागो, रंग, सुय हांची तुमकां खबर आसपाक जाय. तरणाटे सदांच नव्याच्या सोदांत आसतात. आतां फक्त सिनेमांतले फॅशनीचेर अवलंबून रावपाची गरज ना. समाजमाध्यमान हो संवसार व्हड केला. तुमकां जर मनापसून ह्या मळाचेर देंवपाचें आसा जाल्यार विज्ञान फांटो घेवचो. तातूंत फिजिक्स आनी गणित हो विशय जाय पडटा. ह्या अभ्यासक्रमांत तुमकां फॅशनीचो इतिहास, आतांची स्थिती, वस्त्रांचो इतिहास, अश्यो जायत्यो गजाली शिकपाक मेळटल्यो. म्हत्वाचें म्हणल्यार सध्या एआय हें ह्या मळाचेर तुमी कशें वापरूंक शकतात, तें शिकयतात.
करियराचो पयलीं विचार करात
आमचे पुण्याचे दोतोर इश्ट विजय बढे सांगतात, विज्ञान फाट्यांत जे आसात, तांणी आतां दुसऱ्या फाट्यांकूय लागीं दवरपाक जाय. फॅशन अभियांत्रिकी म्हूण फांटो आयला. ते खेरीज पदवी लेगीत तुमी घेवपाक शकतात. तुमकां वाचनाची संद मेळटा. ह्या मळा संबंदींची जायतीं पुस्तकां तुमी वाचून तांचो अभ्यास करपाक शकतात. नवें वर्स 2026 लागलां. हे निमतान सगल्यांक परबीं. तुमी सगल्यांनी आठवे, णववेक आसतनाच करियरा विशीं आत्मपरिक्षण करपाक जाय. निदान धावेचो निकाल लागतकच तरी. आपणाक कितें करपाचें आसा, हें तुमी थारावपाक शकतात. खरेंतर फुडल्या 10 वर्सांत तुमी कितें जावपाक शकतात, हांव कितें करतलो हाचो विचार करचो.
आतां सगल्यां कडेन डायरी आसता. ती नाजाल्यार एक चोपडी विकत घेयात. तुमी करियरा विशीं बरोवन काडूं शकतात. तुमी कसलो आहार घेवचो, व्यायाम कसलो करचो तें इंटरनेटाचेर पळोवपाक शकतात. आमी कुडीचो व्यायाम विसरतात आनी जिबेचो व्यायाम करतात. ताका लागून भलायकी इबाडटा. शिक्षण दिवपी खंयची संस्था बरी तें तपासात. सगल्यांत म्हत्वाची गजाल म्हणल्यार दिसाक कांय वेळ तरी बरोसो खबरां चॅनल पळयात. दिसाळीं वाचात. तांच्यो वेबसायटी, ईपेपर, ब्रेकिंग न्यूज, बुलेटीन आसता. तें वाचात. म्हणटकच सरभोंवतणची म्हायती मेळटली. गिन्यान मेळटलें. विशेश म्हणल्यार वाचपाची संवय लागून गिन्यान, व्यक्तीमत्व सुदारतलें.